Maxkamadda Gobolka Hargeysa oo maanta dhagaysatay dacwaddii loo haystay wariye Coldoon
Talaado, April, 4 2017 (HOL)-Maxkamadda gobolka Maroodi jeex ayaa
maanta dhagaysatay dacwaddii loo haystay wariye Cabdimaali Muuse Coldoon oo
xeer ilaalinta gobolku ku eedeeyeen inuu ku kacay falal ka hor imanaya
qaranimadda Somaliland.
Xeer ilaalintu waxay sheegtay inuu wariye Coldoon uu taageero cad u
muujiyey madaxweynaha Soomaaliya Maxamed Cabdilaahi Farmaajo,isla markaana
olole muuqaalo laga duubay oo uu ku taageerayo madaxweynaha Soomaaliya la hor
keenay maxkamadda horteedda.
Sidoo kale, Xeer ilaalintu waxay ku eedeysay wariyaha inuu ku dhowaaqay midnimada
Soomaaliya iyo in uu aflagaadeeyay madaxda qaranka Somaliland. Waxa kale oo
maxkamadda la hor keenay qoraallo uu soo dhigay bartiisa Facebook iyo muuqaallo ay sheegeen
inay kala baxeen Computerkiisa iyo Mobilekiisa, kaddib markii la xidhay.
Haseyeeshee, wariye Cabdimaalik
Muuse Coldoon ayaa isagu iska difaacay eedaha loo soo jeediyey, waxaanu sheegay
in aanay waxba ka jirin dhamaan eedahaasi.
Saacaddo badan ka dib waxa mar
kale dib loogu dhigay maalinta Barri inay dacwadiisu halkaasi ka sii socoto,
waxaanay maxkamaddu ahayd mid furan oo dadweynuhu ka soo qaybgalayeen.
Wariye Coldoon ayaa muddo ka
badan konton maalmood u xidhan xukuumadda Somaliland, waxaana lagu eedeeyey
inuu arrimo ka dhan ah qaranimada Somaliland ku talaabsaday.
Wariye Coldoon ayaa noqonaya wariyaha
kaliya ee aanay xadhigiisa ka hadal ama
u doodin xisbiyadda mucaaradka iyo ururadda saxaafadda, iyadoo sabab u tahay
arrimaha lagu eedeynayo oo ah inuu ka hor yimid qaranimamadda Somaliland taas
oo keentay in xisbiyadda mucaaradku ka gaabsadaan, ururadda saxaafada
Somaliland hore u sheegeen in aanay u doodi doonin, maadaama oo arrimo
siyaasadeed uu farogaliyey.
Barkhad-ladiif M. Cumar,
Hiiraan Online
[email protected]
Hargeysa, Somaliland.