Dowladda federaalka Soomaaliya iyo beesha caalamka oo wada hadalo ka leh shirka London
Axad, April, 30, 2017 (HOL) – Waxaa soconaya wada hadallo iyo kulamo u
dhaxeeya dowladda federaalka Soomaaliya iyo wakiilada beesha caalamka kaa oo
looga arinsanayo shirka 11 bisha May la filayo in uu ka furmo magaalada London
ee dalka Britain.
Kulankii ugu danbeeyay ee maanta ka dhacay magaalada Muqdisho ayaa waxaa ka
qeyb-gallay xubno ka socda dowladda federaalka iyo wakiilada beesha caalamka
sida, wakiilka xoghayaha guud ee QM ee Soomaaliya, danjiraha midowga Africa,
wakiilo ka kala socday wadamada daneeya
arimaha Soomaaliya oo ka mid tahay
Britain oo shirkan martigalin doonta.
Arrimaha ay ugu waaweyn ee DF Soomaaliya iyo beesha caalamka ay wadahadlayaan si go'aan mideysan looga gaaro ka hor shirka London ayaa waxaa ka mid ah
Qorshaha Amniga, Ddib u habeynta dhaqaalaha iyo Kaalmada abaaraha, waxaa kaloo
ku jira arrimaha siyaasadda ugu muhiimsan sida dib u eegista Dastuurka iyo
gaarista doorasho qof iyo cod ah sanadka 2020.
‘’ Shirkan waxaa uu muhiim u yahay sidii beesha Caalamka
iyo dowladda Soomaaliya ula tagi lahaayeen qorshe mideysan shirka London’’ ayuu yiri Michael
Keating.
Marka aad eegto kulamada soconaya oo ah kuwo wajiyo badan laakiin dhamaantood
ku saleysan shirka London iyo ajandaha iyo tahay in lala tago, ayaa waxaa ay
muujinayaan in doorka beesha caalamka ee shirkan yahay mid aad u weyn.
Madaxweynaha dowladda Soomaaliya Maxamed Cabdullaahi Farmaajo iyo ra’iisal
wasaaraha dalka Britain Theresa May ayaa
la filayaa in wada jir u guddoomiyaan shirka.
C/raxmaan Diini, Hiiraan Online
[email protected]