Axad, April, 30, 2017 (HOL) - Wararka
naga soo gaaraya degmada Waajid ee gobolka Bakool ayaa sheegaya in
dagaalyahanno ka tirsan Al-shabaab xalay xalay weerar ku culus ku qaadeen
fariisimo ciidamada dowladda iyo kuwa Itoobiya ku lahaayeen degmada.
Sida ay warbaahinta u sheegeen dad ku sugan degmada Waajid xoogagga
Al-shabaab ayaa soo qaaday weerar culus taasoo u suurtagalisay in ay gudaha u gallaan
qeybo ka mid ah degmada, gaar ahaan saldhigyadii ay ku sugnaayeen ciidamada
maamulka Koonfur galbeed.
Hasse ahaatee dhinaca kale saraakiisha maamulka Koonfur galbeed ayaa
beeniyay in qeybo ka mid ah degmada la wareegeen Al-shabaab, iyaga oo taa
badalkeeda sheegay in ay iska caabiyeen weerar culus oo ay soo qaadeen xoogagga
Al-shabaab.
Dadka degmada ayaa sheegay in weerarkan uu noqonayo kii ugu xooganaa ee
sanadkan ka dhaca degmada Waajid, inkastoo ilaa iyo hadda aan la ogeyn
khasaaraha rasmiga ah ee soo kala gaaray dhinacyada dagaallamay.
Xaalada degmada ayaa ah mid degan, waxaana soconaya howlgal ballaaran oo ay
wadaan ciidamada maamulka Koonfur galbeed iyo Itoobiya ee halkaa ku sugan.
C/raxmaan Diini, Hiiraan Online
[email protected]