Axad, April, 30, 2017 (HOL) – Madaxweynaha dowladda Soomaaliya Maxamed
C/llaahi Farmaajo ayaa maanta waraaqaha aqoonsiga ka guddoomay Safiirka cusub
ee Itoobiya u qaabilsan Soomaaliya Amb. Jamaaludiin Mustafa Omar.
Madaxweynaha ayaa xarunta madaxtooyada Soomaaliya ku qaabilay Safiirka
Itoobiya Amb. Jamaaludiin oo bishii hore ay dowladda Itoobiya u soo magacawday
Soomaaliya ahna Wakiilka gaarka ah ee dowladda Itoobiya u qaabilsan Soomaaliya.
Danjire Jamaaludiin Mustafa Omar ayaa
ugu horeyn madaxweynaha u gudbiyay nuqulo ka mid ah waraaqdiisa danjirnimo iyo
dhambaal uu ka sido Madaxweynaha dowladda Itoobiya Mulatu Teshome.
Madaxweyne Farmaajo ayaa ku soo dhoweeyay xafiiskiisa Danjiraha cusub ee
Itoobiya Amb. Jamaaludiin, oo ah nin asalkiisu yahay Soomaali, kana soo jeeda
deegaanka Ismaamulka Soomaalida Itoobiya.
Qaabilaada Madaxweynaha oo aheyd mid hab maamuus leh oo la heer ah mida
diblomaasiyadda Caalamiga ah, ayaa waxaa la is dhinac dhigay Calamada Itoobiya
iyo Soomaaliya, xilliga Madaxweynuhu guddoomay waraaqaha aqoonsiga.
Maalintii shalay ayeey aheyd markii wasiirka arrimaha DF Soomaaliya Yuusuf
Garaad Cumar oo nuqul ka mid ah waraaqaha aqoonsiga Danjirnimo uu ka guddoomay
Danjire Jamaaludiin Mustafa Cumar.
Warar soo baxaya ayaa sheegaya in madaxweyne Farmaajo todobaadkan la filayo
in booqasho rasmi ah uu ku tago magaalada Addis Ababa ee dalka Itoobiya.
C/raxmaan Diini, Hiiraan Online
[email protected]