Dhakhaatiir Imaaraadka ah oo baaritaan caafimaad oo bilaasha ah ka wadda magaaladda Hargeysa
Sabti, April, ,29 , 2017 (HOL) – Garoonka
weyn ee kubadda ee Hargeysa Stadium waxa maalmihhii u dambeeyey ka socday
baadhitaanno caafimaad oo bilaash ah oo ay fulinayeen dhakhaatiir ka socota
wadanka Imaaraadka.
In ka badan shan kun oo qof oo
dadka danyarta ah ayaa iska diiwaangaliyey baadhitaanka caafimaad ee
dhakhaatiirta Ajananabiga ahi wadaan, kuwaas oo qalabkoodii iyo
dawooyinkoodiiba wata.
Madaxweyne Axmed Maxamed
Siilaanyo ayaa maanta kormeer ku tagay garoonkaasii iyo sida hawshu u socoto,
waxaanu madaxweynuhu kormeerkiisa xog
waran kaga dhegeystay dhakhaatiirtii ku guda jiray hawshaasi caafimaad.
Markii kormeerka madaxweynuhu soo
dhamaadayna waxa saxaafadda la hadlay dhakhaatiirtii hawsha gacanta ku haysay
oo sheegay inay si fiican hawshu ugu socoto,isla markaana muddo ilaa lix
cishaba ah dalka joogi doonaan.
Wasiirka wasaaradda caafimaadka
Dr Saleebaan Axmed Ciise (Xaglotoosiye), oo madaxweynaha warbixin ka siiyey sida
ay hawshu u socoto iyo dadka la daweeyey ilaa wakhtigan, waxa uu yidhi "Dhakhaatiirtan
Imaaraadka waxa la shaqaynaya dhakhaatiirta wasaaradda caafimaadku, madaxwayne
mudadii dhawrka casho ahayd ee ay joogeen waxa is diiwaan galiyay 5,000 oo qof
ilaa hadda waxay daweeyeen oo ay la kulmeen 2,000 oo qof waxaanu ku rajo
waynahay inay 5,000-ba arkaan. Waxay dawaynayeen cuduro kala duwan. Waxa kale
oo farxad noo ah in dhakhaatiirta wasaarada caafimaadku la shaqayn doonaan
ururkan una raaci doonaan meel kasta oo caalamka ka tirsan".
Intaas kadibna madaxweyne
Siilaanyo ayaa u mahad naqay dhakhaatiirtan iyo dawladda Imaaraadka Carabta ee
soo dirtay, waxaanu yidhi "Aad iyo aad ayaan ugu mahad celinayaa dawladda
imaaraadka iyo dhakhaatiirta halkan timi waxyaabaha ay qabteen iyo hawlaha ay
tarayaan aad baanu ugu mahad celinayaan Alle haydinla qabto gacan buuxdana waa
idin siinaynaa waxaanu idinla qaban karnana waa idinla qabanaynaa"
Barkhad-ladiif M. Cumar, Hiiraan
Online
[email protected]
Hargeysa, Somaliland
