Ciidamada dowladda oo toogasho ku dilay darawal waday gaari Caasi ah magaalada Muqdisho
Jimco, April, 28, 2017 (HOL) –Ciidamada dowladda Soomaaliya
ee ku sugan isgoyska Dan-wadaagta degmada Wadajir ee gobolka Banaadir ayaa
barqanimdii maanta toogasho ku dilay darawal waday gaari Caasi/Hoomey ah oo laga
shakiyay.
Gaar ahaan toogashadan ayaa ka dhacday ilinka laga gaalo
xarunta Xalane qeybta Madiine Gate wadada gasha garoonka diyaaradaha magaalada
muqdisho, kaddib markii ay ciidamada ka
shakiyeen gaariga Caasiga ah oo xowli ku socday.
Goob joogayaal ayaa warbaahinta gudaha u sheegay in
ciidamada isku dayeen in ay joojiyaan gaariga, laakiin uu ka dhaga-adeygay
taasoo keentay in ay rasaas ku furaan.
Hasse ahaatee baaritaan la sheegay in markii danbe lagu
sameeyay gaariga Caasiga ah ayaa la ogaaday in uusan sidin wax qaraxyo ah,
laakiin uu darawalka ka baxsanayay ciidamada dowladda oo halkaa gadiidka
canshuur uga qaada.
Todobaadkii ka hor ayeey aheyd markii ciidamada dowladda ku
toogteen isgoyska Dan-wadaagta labo dhalinyaro ah oo ay ku eedeeyeen in ay
hoobiyaal ku tuurayeen qeybo ka mid ah degmada.
C/raxmaan Diini, Hiiraan Online
[email protected]