Dhakhaatiir ka soo shaqeysay deegaannada ay abaaruhu ku dhufteen oo shahaado la guddoonsiiyay
Jimco, April, 28, 2017 (HOL) - Munaasabad ballaaran oo
lagu maamuusayay wax qabadka dhaqaatiir howlo caafimaad oo samafal ah ka soo
qabtay qaar ka mid ah gobolada ay abaaruhu saameeyeen ayaa lagu qabtay
magaalada Muqdisho.
Munaasabadan oo aheyd mid si weyn loo soo agaasimay ayaa
waxaa soo qaban-qaabiyey Ururka dhaqaatiirta Soomaaliyeed (Somali Medical
Association), waxaana ka qeyb galay aqoonyahano, qaar ka mid ah dhaqaatiirta
magaca ku leh dalka, xildhibaano ka tirsan Baarlamanka Somalia iyo marti sharaf
kale.
Drs. Luul Maxamed Max’uud oo ah Madaxa qeybta gurmadka
deg deg ah ee Ururka dhaqaatiirta Soomaaliyeed oo furitaankii xafladaas ka
hadashay ayaa ka warantay kaalinta Ururka dhaqaatiirta Soomaaliyeed ka
qaadanayo gurmadka abaaraha, waxayna xustay in cudurada Jadeecada iyo daacuunka
ay yihiin kuwa ugu badan ee sameeyey dadka ku nool gobolada ay abaaruhu ka
jiraan.
“Meelaha aan dhaqaatiirta u dirnay ee cuduradan ay ka
jireen waxaa ka mid ah gobolada Bay iyo Bakool oo ka mid ahaa meelaha ugu daran
ee dhimashadu ka jirtay, dhaqatiirtuna ku yaraayeen, shaqo fiican ayey ka soo
qabteen runtii, xaaladii adkeyd ee ka jirtayna wax badan ayey ka bedeleen sidoo
kale dadka ku soo barakacay gobolka Banaadir iyo hareerihiisa ayey dhaqaatiirtu
baaritaano iyo daweyn u sameeyeen” ayey tiri Drs. Luul oo intaa ku dartay in
baahida loo qabo dhaqaatiirtu ay badan tahay balse ay kooban tahay awooda
ay ku dabooli lahaayeen, tas’hiilaad xumo iyo isku xir la’aan jirta awgeed,
iyadoo soo jeedisay talooyin ku aadan sidii wax looga qaban lahaa caqabadaha
jira.
Guddoomiyaha Ururka dhaqaatiirta Soomaliyeed Dr. Maxamed
Yuusuf oo isna munaasabadaas ka hadlay ayaa ku bogaadiyey dhaqaatiirta ka soo
laabatay gobolada ay ka jiraan abaaraha, wuxuuna dhinaca kale xusuusiyey in
weli shaqo badan ay harsan tahay maadaama cuduro iyo dhibaatooyin bada laga
sheegayo gobolada dalka qaarkood, loona baahan yahay in wax laga qabto, wuxuuna
ku booriyey iney dedalkooda sii wadaan.
Guddoomiyaha Mu’asasada Jaamacadda Banaadir Dr. C/llaahi
Shiikh Xuseen (Bushkuleeti) oo isna halkaas ka hadlay ayaa sheegay in
dhaqaaatirta dhalinyarada ah yihiin kuwo looga fadhiyo iney cudurada ka
badbaadiyaan bulshada Soomaaliyeed, maadaama buu yiri dhaqaatiirtii hore ay da’
ka daba timid, wuxuuna xusay in xaaladaha ka dhashay abaaraha aysan weli fari
qodneyn, loona baahan yahay dedaal iyo shaqo adag.
Prof. Cismaan Maxamuud Dufle oo ah Senator ka tirsan
aqalka sare ee Baarlamanka Somalia ayaa isna ku amaanay dhaqaatiirta ka soo
shaqeeyey gobolada howsha culus ee ay soo qabteen xili baahi weyn loo qabay,
wuxuuna xusay in tani ay muujineyso kaalinta muhiimka ah ee ay kaga jiraa
bulshada.
“Cuduradii ka dhashay abaaraha weli waa jiraan, inkastoo
awooda ururka dhaqaatiirta Soomaliyeed ay tahay mid aad u kooban, haddana
dedaalka ay muujiyeen waa wax aysan taariikhdu iloobi doonin, waxaana ku
boorinayaa iney sii wadaan intii karaankood ah gurmadka ay shacabkooda kaga
badbaadinayaan cudurada abaaraha ka dhashay” ayuu yiri Prof. Dufle oo dhinaca
kale ka waramay kaalinta dhaqaatiirtu kaga jireen weligood wax u qabashada
bulshadooda.
Waxaa sidoo kale xafladaas hadalo ka jeediyey xubno ku
hadlayey magaca dhaqaatiirta da’da yare ee ka soo laabtay gobolada ay ka jiraan
abaaraha, sidoo kale waxaa khudbado aad u qiime badnaa ka jeediyey dhaqaatiir
ay ka mid ahaayeen Dr. Cismaan Aadan Cadde, Dr. Xassan Maxed Xabiibullah
Xoghayaha guud ee Ururka Dhakhaatiirta Soomaaliyeed (SMA) iyo xubno kale.
Munaasabada ayaa ugu danbeyntii ayeey urur dhaqaatiirta
Soomaaliyeed shahaado Sharafeed ku guddoonsiiyeen dhaqaatiirtii ka soo shaqeeyey gobolada dalka
oo isugu jiray hablo iyo Wiilal kuwaasoo ay ku muteysteen sida naf hurnimada
leh ee ay wax uga soo qabteen cuduradii ka jiray degaanadii loo diray.