Talaado, April, 25, 2017 (HOL) – Maamulka gobolka Nuugaal iyo saraakiisha
ciidamada dowlad gobolleedka Puntland ayaa kulan la yeeshay maanta xubo ka
tirsan urur diimeedka Al-Saaciduuna Bil-xaq oo dhawaan laga mamnuucay
deegaannada Puntland.
Kulanka oo noqonaya kii ugu horeeyay ee labada dhinac si toos ah u dhaxmara
ayaa lagu hishiiyay qodobo dhowr ah oo dhamaantood quseeya dhaqdhaqaaqa urur
diimeedkan oo Puntland uga shakisay in uu ka mid yahay ururada lagu tilmaamo
argagixisada.
'' Waxaa ku heshiinay, inaysan ka mid ahayn urur diimeedka takfiir. innaysan wax ah hub ah qaadan karin, inaysan sameyn karin wax tababar ciidan, inaysan siyaasad ku jirin gelina karin, in aysan nabad gelyada Puntland dhibaato ugeysan, in ay diyaar u noqdaan inay dowladda iyo cid walba oo fekerkooda ka soo horjeeda
la kulmaan, si wax looga weydiiyo afkaartooda, in ay dowladda la kulmi karaan, ayuu yiri guddoomiyaha gobolka Nugaal Cumar Cabdullaahi Faraweyne.
Jamaal Xasan Aw Muuse oo ka mid ah xubnaha Jaamacadda Saadicuun bil
xaq ee ku sugan Puntland ayaa sheegay inaysan urur diimeedkoodu ahayn
urur Takfiiri ah oo aan la lahayn wax xiriir ah ururka Alshabaab.
Heshiiskaan dhex maray maamulka gobalka Nugaal, taliska la dagaalanka argagixisada
iyo xubnahaan Al-Saaciduuna Bil Xaq ayaa ku soo aadaya xili dalka Soomaaliya
laga mamnuucay urur diimeedkaan.
C/raxmaan Diini, Hiiraan Online
[email protected]