Talaado, April, 25, 2017 (HOL) – Maamulka degmada Beledweyne ayaa sheegay in
sii xirnaan doonaan ilaa 11 oday dhaqameed oo dhawaan xabsiga la dhigay, kaddib markii la sheegay in ay isku heyb ka
soo jeedaan askari qof shacab ah ku dilay dulleedka degmada Beledweyne.
Maxamed Ibraahim Food Cade guddoomiyaha degmada Beledweyne ayaa sheegay in
odayaashan looga fadhiyo in ay soo gacan-galiyaan askari qof shacab ah ku dilay
duleedka magaalada oo la sheegay in uu ka baxsaday ciidamada.
‘’Waa lagu raad joogaa askarigii dilka geystay odayaashana waa ay sii xirnaan
doonaan ilaa hay’adda amniga loo soo gacangalinayo askariga dilka geystay ayuu
yiri guddoomiyaha degmada.
Odayaashan ayaa dhinacooda ku doodaya in aysan ogeyn sabab xabsi ku muteysan
karaan, madaama maamulka shaqadiisa tahay in ay soo qabtaan askariga dilka
geystay.
Waa markii ugu horeysay oo tiro intaa la eg oo odayaal ah xabsiga loo dhigo
iyaga oo ku eedeysan in ay isku heyb yihiin askari ka tirsan ciidamada dowladda
oo dil geystay.
C/raxmaan Diini, Hiiraan Online
[email protected]
