Ra’iisal wasaare Kheyre iyo madaxda maamul gobolleedyada oo ka wada hadlay xaalada abaarta
Axad, April, 16, 2017 (HOL) - Ra’iisul
wasaaraha xukuumada Soomaaliya Xassan Cali Kheyre ayaa maanta shir guddoomiyay
kulan ay ka qeybgalleen madaxda dowlad gobolleedyada dalka oo warbixin ka
dhageystay gudiga gurmadka abaaraha heer Qaran.
Kulanka oo ka dhacay magaalada Muqdisho ayaa siweyn loogu lafaguray xaalada
abaarta ka jirta dalka iyo halka ay marayaan dadaallada loogu gurmanayo dadka
ay abaartu saameysay.
Guddoomiyaha guddiga gurmad abaaraha ee heer Qaran Sheekh Nuur Baaruud ayaa
sheegay in mudadii saddexda bilood ee guddiga shaqeynayay lacagihii ay qabteen
intooda badan la gaaarsiyay dadkii u baahnaa, wuxuna si gaar ah mahad uga mahad celiyay cid walba oo gacan ka geystay gurmadka.
Qaar ka mid ah madaxda maamul gobolleedyada ayaa ku ammaanay guddiga gacanta
ku haya gurmadka Abaaraha sida ay u dhawrayaan ammaanada loo dhiibay, waxayna
sheegeen in loo baahan yahay guud ahaan dadka Soomaaliyeed ay isku tashadaan si
looga maarmo kaalmo shisheeyo.
Ra’iisul wasaare Kheyre ayaa sheegay in dadka Soomaaliyeed ay muujiyeen isku
tashi, isagoo tilmaamay in gurmadkani uu ka turjumayo soo noqoshada kalsoonidii
ay isku qabeen bulshada Soomaaliyeed.
Kulanka ayaa noqonaya kii ugu horeeyay ee dhaxmaray mas’uuliyiinta dowladda
federaalka, madaxda dowlad gobolleedyada iyo guddiga gurmadka abaaraha ee heer
Qaran.
C/raxmaan Diini, Hiiraan Online
[email protected]
