Sabti, April, 15,
2017 (HOL) – Guud ahaan goboladda Somaliland ayaa laga
oogay salaad Roob doon ah, waxaanay dadweynuhu iskugu soo baxeen garoomadda
waaweyn iyagoo ilaahay ka baryaya inuu Roob khayr qaba waraabiyo.
Magaaladda
Hargeysa ayaa la iskugu soobaxay garoomada kubadda cagta lagu ciyaaro, waxaana
culimadu ilaahay ka baryeyaan inuu Abaarta adkaatay ka jabiyo, roob khayr qabana
ku maansheeyo dhulkiisa iyo dadkiisaba.
Madaxweynaha
Somaliland Axmed Maxamed Siilaanyo ayaa isna garoonka kubada cagta ee
magaaladda Hargeysa kala qaybgalay dadweynaha iskugu soo baxay Alla barigga ee
maanta salaadii roob-doonta kula tukaday Hargeysa Stadium.
Markii
salaada la tukaday Madaxweynuhu waxa uu halkaasi ka jeediyey hadal u
badan Duco iyo Alla barri, waxaanu yidhi “Ilaahay waxaynu ka baryeynaa inuu
roobdoontaa inoo aqbalo, ilaahay waxaynu ka baryeynaa inuu madar khayr qaba
cirka inaga siiyo, ilaahay waxaynu ka baryeynaa inuu abaarta inaga jebiyo,
ilaahay sidaasaynu ka baryeynaa, ilaahayna ha inoo aqbalo, ilaahaw noo aqbal,
ilaahaw noo aqbal”
Guud
ahaan goboladda Somaliland, gaar ahaan goboladda Barigga ayaa ay ku dhufatay
abaartii ugu adkayd ee muddo dheer la arko, waxaana la sheegayaa inay dad badan
haraad iyo cunto la’aan halis ugu jiraan geeri, sidoo kale waxa warar kale oo
ka imanaya deegaanka Wadaamo goo ay sheegaan in nin xaaskiisa oo umushay Biyo u
waayey uu geed iska soo daldalaayo,isla markaana halkaasi ku geeriyooday.
Baddi
dadkii ku noolaa Miyiga ayaa xoolihii ka dhamadeen, waxaana hadda cabsi weyn
laga qabaa haddii aanu alla usoo gurman inay dadkuna ku xigaan xoolaha oo
tarabtab u geeriyoodaan.
Barkhad-ladiif
M. Cumar, Hiiraan Online
[email protected]
Hargeysa,
Somaliland.