Shir wadatashi ah oo dowladda federaalka iyo madaxda maamul gobolleedyada beri uga furmaya Muqdisho
Jimco, April, 14, 2017 (HOL) – Magaalada
Muqdisho waxaa ka soconaya qaban-qaabada shir wadatashi ah oo maalinta beri ay
uga furmaya mas’uuliyiinta sare ee dowladda federaalka iyo madaxda maamul
gobolleeyada dalka ka dhisan.
Qaar ka mid ah madaxweynayaasha maamul
gobolleedyada ayaa durbaba soo gaaraya Muqdisho, halka kuwa kalana la filayo in ay yimaadaan saacadaha nagu soo foolka leh.
Madaxweynaha dowladda federaalka Soomaaliya Maxamed Cabdullaahi Farmaajo oo
kulanka shir guddoomin doonaa ayaa la filayaa in looga hadlo xoojinta xiriirka dowladda federaalka Soomaaliya iyo
maamullada dalka, arrimaha ammaanka iyo sidii ajenda mideysan looga qaadan
lahaa kulanka la filayo in uu dhawaan ka dhaco magaalada London ee dalka
Ingiriiska, kaasoo looga hadli doono arrimaha Soomaaliya.
Ujeedada kulanka dowladda dhexe iyo madaxda maamul gobolleedyada dalka ayaa sidoo kale lagu sheegay sidii meesha looga saari lahaa is bar bar yaaca madaxda
Soomaalida marka ay jiraan kulamada heerka caalami ah ee looga hadlayo arimaha
Soomaaliya, waxaana muuqata in mas’uuliyiinta sar sare ee dowladda federaalka
ku tirtirsiinayaan hogaamiyayaasha maamul gobolleedyada in shirka iyo ajendaha lala
tagayo intaba looga danbeeyo dowladda dhexe.
Madaxweynaha maamulka Jubbaland Axmed Maxamed Islaam [Axmed Madoobe] oo ka mid ah madaxda maamul gobolleeyada ku
sugan magaalada Muqdisho ayaa kulan gaar ah la qaatay safiirka dowladda UK ee
Soomaaliya Divid Concar oo ay ka wada hadleen arimo la xiriira shirka bisha
danbe ka furmaya magaalada London.
Safiirka dowladda UK ayaa ku bogaadiyay maamulka Jubbaland sugida amniga iyo
waliba sida ay diyaarka u yihiin bur burinta kooxaha ka soo horjeeda dowladda.
Britain ayaa dhowr jeer oo hore soo qabanqaabisay kulamo heer caalami ah oo
looga hadlayay arimaha Soomaaliya, waxaana ay ka mid tahay dowladdaha
taageerada dhaqaale siiya Soomaaliya.
C/raxmaan
Diini, Hiiraan Online
[email protected]
