Jimco, April, 14, 2017 (HOL) –Xili
kasta waqtigaan oo kale waxaa magaalada
Columbus ee gobalka Ohio lagu qabtaa koobka ciyaaraha garoomada dedan ee
Soomaalida. kaasi oo loogu yeero CISC: Columbus Indoor Soccer Cup.
Koobkan
oo la qabanayo sandkiisii 17naad ayaa waxaa ku kulma ciyaartoydii barisamaadkii
iyo dhalinyaradda qurbaha ku koray oo
xiisaya qaybaha kala duwan ee isboortiga , waxaana kulamadaan oo socda mudo 4 cisho ah wada
ciyaaro kooxaha soomaalida ee gobalada dalkan Mareykanka iyo Canada.
Koobka
oo shalay furmay ayna ka soo qeyb galeen 17 kooxdood oo kala duwan oo
ciyaaarahan ka qeybgalaya, tartankaan ayaa waxa uu socon doonaa ilaa iyo
maalinta Axadda ee foodda nagu soo heysa ,waxaana koobka hada loo tartamayo
sanadkii hore ku guulaystay koox ka socatay Magaaladda Seatle ee gobolka Washington.
Shalay
waxaa lagu furay ciyaaraha Kooxaha
Somali Tigers oo Minnesota ka dhisan iyo FC North Stars oo ka socday
Columbus Ohio waxayna guushii ku raacday 5 iyo 4 kooxda North Stars, ciyaartii
xigtay oo ay wada ciyaareen Twins City Stars Iyo Halgan United oo Minnesota ka
wada yimi ayaa ku kala baxay barbardhac 3 iyo 3 ah.
Bashiir
Maxamuud Cilmi oo loo yaqaano Bashiir Geelle oo ah madaxa gudiga qabanqaabada
ciyaarahaan ayaa HOL u sheegay in
sanadkaan uu yahay sanadkii ugu kooxaha badnaa intii ciyaarahaan la qabanaayay.
Xafladii
furitaanka Ciyaaraha ayaa waxaa ka hadlay Scott Birthlowe oo ah sarkaal ka tirsan ciidamada booliiska
ee magaaladda Columbus . Sarkaalka ayaa sheegay inuu ku
faraxsan yahay tartankaan isboorti oo bulshadaan isku keenay, waxuuna sii raaciyey inuu wado qorshe ay ku doonayaan inay ku qortaan Askarigii ugu horeeyay ee Soomaali ah oo ka mid noqda Booliiska magaaladda Columbus,
Scott Birthlowe waxa ugu baaqay dadka Soomaaliyeed inay waraaqaha codsiga shaqada soo buuxiyaan, isagoo xusay in fursadaan u banaan tahay qof kasta oo Soomaali ah ee dagan dalkaan Maraykanka
Siyad Said Salah
Hiiraan Online
[email protected]
Minneapolis MN
