Midowga Yurub oo siweyn uga hor yimid dilkii Puntland ay ku fulisay shan dhalinyaro ah
Arbaco, April, 12,
2017 (HOL) - Ururka midowga Yurub ayaa qoraal ka soo baxay waxaa siweyn looga
soo horjeestay dilkii dhawaan maamulka Puntland uu ku fuliyay shan dhalinyaro
Soomaali ah oo ku eedeysnaa in ay ka tirsanaayeen ururka Al-shabaab.
Warkan ka soo baxay midowga Yurub ayaa lagu sheegay in
xukunka dilka marnaba aheyn qaab ciqaabeed baajinaya fal danbiyeedka, iyaga oo intaa ku daray in ciqaabta dilka
tahay arin marka la eego ka baxsan sida ay hadalka u dhigeen bani’aadannimada.
Laakiin dhinaca kale midowga Yurub ayaa qoraalkooda ku
sheegay in sida ugu weyn ay u cambaareynayaan falalka wax ay ugu yeereen
argagixisada iyo cid kasta oo taageerta.
Hasse ahaatee walaaca ugu balaaran ayeey ka muujiyeen isticmaalka ciqaabta
dilka ah ee ay adeegsadana Maxkamadaha ciidamada Soomaaliya.
Waxaa ay ugu baaqeen Puntland iyo dowladda dhexe intaba in ay si kumeel gaar
ah u hakiso xukunada dilka isla markaana ay xaqiijiso in dadka rayidka ah la
saaro maxkamadaha rayidka.
Waxaa ay ugu danbeyntii ay sheegeen in ay ka go’an tahay xoojinta nidaamka
garsoorka Soomaaliya iyo horumarinka dhaqanka sharciga iyo cadaalada, waxaana
ay ugu baaqeen maamulada Soomaalida in la joojiyo isticmaalka ciqaabta dilka.
Hadalka ka soo yeeray ururka midowga Yurub ayaa imanaya xili marar badan oo
hore sidan oo kale maxkamadaha ciidamada dalka dhalinyaro ugu fuliyeen xukunno dil ah, kuwaa oo qaarkood ku eedeynaa ka
tirsanaanta ururka Al-shabaab iyo kuwa kale oo qirtay in ay falal dil ah
geysteen.
C/raxmaan
Diini, Hiiraan Online
[email protected]
