Madaxweyne Farmaajo : Waxaan diyaar u nahay in aan wada hadal la furno madaxda Al-shabaab
Arbaco, April, 12, 2017 (HOL) – Madaxweynaha
dowladda Soomaaliya Maxamed Cabdullaahi Farmaajo oo maanta khubad ka jeedinayay
munaasabada xuska 57 sano guuradii ka soo wareegtay aas-aaska ciidamada xoogga
dalka Soomaaliyeed, ayaa sheegay in dowladda diyaar u tahay wadahadal lala galo madaxda Al-shabaab.
‘’Waxaan leenahay hogaamiyayaasha Al-shabaab mudo 10 sano ka badan ayaa
dagaalameyseen, waxa aad leyneysaan oo aad hantidooda bur burineysaan waa
dadkiinii, hubka iska dhiga oo noo imaada, waxaa diyaar u nahay in aan wada
xaajood idinla furmo ayuu yiri madaxweynaha dowladda Soomaaliya.
Laakiin dhinaca madaxweynaha ayaa mar kale ku celiyay ay socdaan qorshayaal
sida uu hadalka u dhigay mudo labo sano ah lagu soo afjarayo dagaalka ka dhanka
ah ururka Al-shabaab.
‘’Dowladda waxaa ka go’an in mudo labo sano ah ku soo afjarto dagaalka ka
dhanka ah ururka Al-shabaab, haddii aysan u dhaganuglaan baaqa dowladda ee ah
in ay hubka iska dhigaan wada xaajoodkana aqbalaan goobaha ay joogaan ayaan ugu
tagi doonnaa’’ ayuu yiri madaxweyne Farmaajo.
Dhinaca kale, madaxweynaha ayaa sheegay in uusan iclaamin dagaal, hasse
ahaatee dhawaan warbaahinta ka sii daayay in dalka uu ku jiro xaalad dagaal,
isaga oo arintaa ku fasiray baraarujin.
‘’ Waxaad ogtihii dhawaan in aan iclaamiyay dagaal, anniga dagaal ma iclaamin ee
waxaan sheegay in dalka uu ku jiro xaalad dagaal, taasoo ujeedadeedu aheyd in
dadka hurada laga kiciyo’ ayuu intaa ku darray madaxweynaha.
Waa markii ugu horeysay oo madaxweynaha Farmaajo uu ku dhawaaqo wada xaajood
iyo wada hadal ay la furayaan hogaamiyayaasha iyo madaxda ururka Al-shabaab oo dagaal ba’an kula jira dowladda iyo
ciidamada howlgalka AMISOM.
C/raxmaan
Diini, Hiiraan Online
[email protected]
