Jaacadda Minnesota oo lagu soo bandhigay Buug uu qoray Prof. Samatar
Arbaco, April, 12, 2017 (HOL) –Jaamacadda Gobalka Minnesota ayaa shalay waxaa lagu soo bandhigay buugga
Dimuquraadiyaddii ugu Horreysay Afrika ee uu qoray Prof. Cabdi Ismaaciil
Samatar oo wax ka dhiga isla Jaamacadda Minnesota.
Xafladdan oo uu Mudane Samatar bulshada ugu saxiixayay buuggiisa,
ayaa waxaa ka soo qeyb galay mas’uuliyiin ka tirsan Jaamacadda
Minnesota, Arday iyo qeybaha kala duwan ee bulshada Soomaaliyeed ee
gobalka Minnesota. Dadkii ka hadlay madasha waxaa ka mid ahaa, Robert T.
Kudrle oo ka tirsan Jaamacadda oo sheegay in Soomaalida iyo Jaamacadda
Minnesota uu xiriir wanaagsani ka dhaxeeyo.
Sidoo kale waxaa isna munaasabadda oo lagu qabtay qeybta Humphery ee
Jaamacaadda Minnesota ka hadlay, Prof. John Adams oo si dhow ay isu
yaqaanaan Prof. Cabdi Ismaaciil Samatar. John Adamas waxa
uu aad ugu dheeraaday taariikhda iyo dadaalkii dheeraa ee uu Mudane
Samatar usoo galay waxbarashadiisa, waxa uuna xusay inuu door muhiim ah
ku leeyahay Jaamacadda Minnesota.
Prof. Cabdi Ismaaciil Samatar ayaa ugu danbeyntii la hadlay bulshadii
isugu timid inay wax ka ogaato buuggiisa uu dhawaan qoray ee
Dimuquraaddiyaddii ugu Horreysay ee Afrika, oo markii ugu horreysay lagu
soo bandhigay gobalka Minnesota. Prof. Samatar waxa uu sheegay in
buuggiisu uu ku saabsan yahay biloowgii hore ee dimuguraadiyadda
Soomaaliya, oo ay hormuud u ahaayeen madaxweynihii hore ee Soomaaliya
Adan Cabdulle Cismaan iyo Raysul-wasaare Cabdirisaaq Xaaji Xuseen.
“Buuggani waxa uu ku tusayaa halgankii loo soo galay gobonimada
woqooyi iyo koonfurba, dadku sidii ay isugu kalsoonaadeen, iimaanka iyo
edebta la lahaa, iyo guushii aynu gaadhnay ee aheyd ineynu Afrika
hormood ka noqono -marka ay noqoto sida loo maamulo wadan, sida dadkeeda
loo ixtiraamo, sida looga tago shaqada marka dadku ay ku yiraahdaan na
dhaaf” ayuu yiri Cabdi Ismaaciil.
Prof. Samatar ayaa xusay inuu buuggani barayo caruurteena taariikhdii
wanaagsaneyd ee ay Soomaalidu lahaan jirtay. Buugga oo afka Ingiriiska
ku qoran ayuu Mudane Samatar waxa uu u rajeeyay bulshada Soomaalidu inay
aqristaan si ay wax badan oo taariikhdooda ah u ogaadaan ugana
faa’iidaan.
Siyad Said Salah
Hiiraan Online
[email protected]
Minneapolis MN
