Ehelada nin dhawaan ciidamada Kenya ay xireen oo beeniyay in uu ka tirsan yahay kooxda Daacish
Arbaco, April, 12,
2017 (HOL) – Ehelada nin dhawaan ciidamada Kenya ay ku xireen gobolka Waqooyi
Bari Kenya ayaa beeniyay in eedeymo loo soo jeediyay oo ahaa nin uu ka tirsan
yahay kooxda Daacish iyo kooxaha wax tahriibiya.
Nabadoon Axmed Xusseen oo ka mid ah ehlada eedeysanaha xiran
ayaa warbaahinta u sheegay in waxba kama jiraan yihiin wararka sheegaya in Cali
Xusseen Cali ka tirsan yahay kooxda
Daacish.
‘’Arintaa annaga waxaa ka aragnay warbaahinta, gaar ahaan
kuwa ka soo baxa dalka Kenya, waa been abuur, xaqiiqdana waxaa ay tahay in Cali
Xusseen Cali uu ahaa ganacsade siweyn looga yaqaanay gobolka Waqooyi Bari,
waxaana arintaa ka danbeeyay dad kale oo doonaya in ay hantidiisa boobaan’’ayuu
yiri nabadoonka.
Ehelada ayaa ka codsaday mas’uuliyiinta sar sare ee dowladda
Soomaaliya in ay soo faragaliyaan arintan, madaama ganacsadahan xiran uusan
laheyn sida ay hadalka u dhigeen wax danbi ah.
Ciidamada Kenya ayaa dhawaan gobolka Waqooyi Bari Kenya
ku xiray ganacsade lagu magacaabo Cali Xusseen oo ay ku sheegeen in uu xiriir la leeyahay
kooxda Daacish.
C/raxmaan
Diini, Hiiraan Online
[email protected]