Wasaarada waxbarashada Soomaaliland oo saddex Jaamacadood kala noqotay aqoonsiga
Talaado, Abriil,11 , 2017 (HOL) – Wasiirka Waxbarashadda
Somaliland Cabdilaahi Ibraahim Habanne (Cabdilaahi Dheere) ayaa sheegay in
saddex jaamacadood oo wadanka ku yaala kala noqdeen rusqaddii jaamacadnimo ee
markii hore siiyeen.
Wasiirka waxbarashada ayaa sheegay in guddida tacliinta sare ee
wasaaradda waxbarashadda baadhitaan dheer oo ay galeen iyo qiimayn ay ku
sameeyeen ku ogaadeen in shuruudihii jaamacada laga rabay ay ku fashilmeen,isla
markaana jaamacadaha marka hore si ku meel gaadh ah loo siiyey jaamacadnimo
markii ay ogaadeen inay qiimayntii ku soo bixi waayeen kala noqdeen rusqaddii.
Wasiir Habbane oo arrintaasi ka hadlaya waxa uu yidhi “ Guddida
Jaamacaddaha u xil saaraan inay qiimeeyaan oo jaamacadaha marka la furayo si ku
meel gaadh ah ayaa rusqada loo siiyaa, marka hawl galaan waxa dib loo qiimeeyaa
inay jaamacadnimo inay u qalanto oo tayadii waxbarasho leedahay iyo in
kale, haddii ay ku fashilanto waa la gala noqonayaa”
Waxaanu intaas ku daray “Sidaas darteed ayaanu u baahanay
go’aamadda guddida tacliinta sare, waana ku qanacsanahay wasaarad ahaan in
arintaasi ay u cuskadeen saxtahay, wana arrin aanu si waddi doonno, illaa inta
aanu ka gaadhayno tayadda aanu doonayno iyo waxbarashadda aynu doonayno inay noqdaan,
ka sugno, jaamcaadaasi Togdheer International University la baxday horana loo
odhan jiray Addis University College , oo jahawareer iyo khal khal ku abuurtay
bulshadda gobolka Togdheer, waa la xayiray ardaydan waxa loo habeen doonaa
halka ay ku kala haboon yahay, qoladda labaad waxa weeyi Almachad
Caali oo Hargeysa ka furan, wuxu isna ka soo bixi waayey shuruudihii ay
jaamacaduhu lahaayeen, horn International University oo iyana la isku
qabsaday wakiilnimadda jaamacadda, waxaana u daynay qoladii hore ee soo qaatay
tan dambe waanu kala noqonay rusqaddii kamana shaqayn karto.”
Waa markii ugu horeysay ee Jaamacaddo wadannka ka jiray la gala
noqdo rusqaddii ay ku shaqaynayeen, waxaana kala yihiin saddexda Jaamacadood
Togdheer International Universaty Ex Addis Universaty College, Al Maxad Caali
iyo Horn Inertnational Universaty Hargeysa.
Haseyeeshee waxa wararka naga soo gaadhaya jaamacadaha rusqadii
lagala noqday sheegeen in aanay ku qancin go’aanka wasaaradda ka soo baxay,
waxaanay ku doodayaan inay ahayd in wixii ka khaldan nidaam ahaan loogu soo
gudbiyo, balse aanay ahayn in warbaahinta loo soo mariyo go’aan lagu xayirayo
jaamacadahooga.
Barkhad-ladiif M. Cumar, Hiiraan Online
[email protected]
Hargeysa, Somaliland.
