Hargeysa : Culimadii xarrakadda cusub ee islaamiga ah ku dhawaaqday oo xabsiga la dhigay
Talaado, April, 11 2017 (HOL)- Xukuumadda Somaliland ayaa
xabsiga u taxaabay xubno ka mid ah culimaddii dhawaan ku dhawaaqay urur
Diimeed ay ugu magac dareen Al-Saaciduuna Bil Xaq kaas oo ay ku sheegeen in ay
wadeen qorshahiisa muddo 45 sanadood ah.
Waxaana kooxdan culimada ah ay dhawaan hal mar uun kaga wada
dhawaaqeen magaalooyinka Hargeysa, Muqdisho, Masar iyo Puntland.
Taliyaha ciidanka Booliska Somaliland Sareeye Guuto Cabdilaahi
Fadal Imaan ayaa ka dhawaajiyey in ciidamada Booliska Somaliland hawl gallo ay
shalay bilaabeen ay kusoo qab-qabteen saddex kamid ah kooxdaa culimada ah ee
gudaha Somaliland kaga dhawaaqday urur Diimeedka, waxaana uu xusay sidoo kale
in ururkaasi uu yahay mid sharci darro ah isla markaana Khalkhal galinaya
amaanka dalka.
“Sidaad la socoteen waxa dhawaan Koox wadaado ahi ay
caasimada Hargeysa kaga dhawaaqeen urur ay ku sheegeen magaciisa Al-saadicuuna
Bil Xaq kaas oo aan sharci ahayn khatarna ku ah nabadgaliyada qaranka iyo
nabadgaliyada Bulshada Reer Somaliland,intaas kadib ciidamada Booliska
Somaliland waxay galeen hawl gallo balaadhan shalay oo Taariikhdu ahayd
10.04.2017- ilaa wakhtigu markuu ahaa 11 subaxnimo ilaa xalay 3 habeenimo ku
jireen hawl gallo balaadhan,ciidanka boolisku waxay gacanta kusoo dhigeen
Saddex xubnood oo kamid ah xubnihii ku dhawaaqay Ururkaas ah waxaana isla
markiiba si deg deg ah looga xalaaleeyey maxkamadda awooda u leh iyo xeer
ilaalinta,iyaga oo ay ciidanka Boolisku cuskanayaan,marka uu kiisku yahay kiis
culus sida uu tilmaamayo qodobka 58-Aad xeerka habka ciiqaabta xubintiisa
Labaad waaran la’aan hadaad cid nabadgaliyada looga cabsi qabo inay waxyeelayso
ama baxasanayso waaran la’aan ayay ku gali karaan si dhakhso ahna waa in markaa
maxkamadda looga xalaaleeyaa markaas ciidamada Boolisku waxay hadda gacanta ku
hayaan Saddex xubnood oo kamid ah xubnihii Hargeysa kaga dhawaaqay Urur
diimeedkaas”ayuu yiri Taliye Fadal.
Waxa kale oo uu taliyuhu ka hadlay in ciidanka Booliska amar
lagu siiyey inay qabqabtaan dirawaladda aan liisanka gaadhiga haysan iyo
Gaadiidka Bacda madow ku xidha muraayadaha gaadhiga, kuwaas oo uu ku tilmaamay
kuwo amniga halis ku ah.
Maalmihii u dambeeyey ayaa si weyn loo hadal hayey koox culimo
ah oo ku dhawaaqay xarako cusub oo islaami ah, taas oo dadku wax badan iska waydiinayeen,
waxaana ka hadlay guddida wanaag farista oo sheegay inay halis ku yihiin amniga
wadanka haddii aan wax laga qaban, taas ayaa keentay in si dhakhso ah talaabo
looga qaado.
Barkhad-ladiif M. Cumar, Hiiraan Online
[email protected]
Hargeysa, Somaliland.