SHEEKH CALI DHEERE: Doorashada Sanadkan dhacaya waxaa nooga qorsheysan dil iyo dagaal
Talaado, September
20, 2016 (HOL) — Al-shabaab ayaa markii u horreysay ka hadashay Doorashooyinka
dadban ee lagu sannadkan daba-yaaqadiisa lagu wado inay ka dhacaan dalka,
laguna soo doorto madaxweynaha iyo Baarlamaanka.
Afhayeenka Guud ee Al-shabaab,
Sheekh Cali Maxamuud Raage (Shiikh Cali Dheere), ayaa sheegay in Doorashooyinkaan go’aanka
uga degsan uu yahay Dil iyo Dagaal, isagoo digniin u diray odayaasha dhaqanka
ee soo xulaya baarlamaanka cusub.
“Go’aanka nooga dagsan
doorashadaas waa dil iyo dagaal, waa qorshe dowladaha shisheeye soo agaasimeen
oo laga leeyahay hadaf Gumeysi oo Dano-gaar ah laga leeyahay,” ayuu yiri Sheekh Cali Dheere.
Sidoo kale, Afhayeenka ayaa u
jeediyay odayaasha dhaqanka ee xildhibaanada Baarlamanka cusub soo xulaya, isagoo
xusay inaysan noqon in laga dhigto aalad meel lagu fuulo, kadibna la iska tuuro
sidii horay u dhacday oo kale.
Dhanka kale, Sh. Cali
Dheere ayaa ku boorriyay Xoogagga Al-shabaab in ay weerarro ku qaadaan
goobaha Doorashooyinka ka dhacaya Soomaaliya, isagoo uga digay shacabka inay ka
qayb-qaataan Doorashooyinka.
Ugu dambeyntii, Xarakada Al-Shabaab
ayaa muddo sanndo ah isku dayaysay inay ka tuurto xilka Xukuumadda Federaalka Soomaaliya
ee uu Caalamka Aqoonsan yahay, iyagoo dagaal kula jira ciidamada AMISOM iyo
kuwa Dowladda Soomaaliya.
Maxamed X. Xuseen, Hiiraan Online
[email protected]
Muqdisho, Soomaaliya