Arbaco,
December, 28, 2016 (HOL) – Baarlamaanka
cusub ee 10aad oo kalfadhigiisii yeeshay maalintii shalay, ayaa lagu wada in
maalmaha soo socda ka doodaan waqtiga la qabanayo doorashada hogaanka sare ee
dalka.
Guddoomiyaha KMG ah ee baarlamaanka Cismaan Cilmi Boqorre
ayaa sheegay in fadhiyada ugu soo horeeya ee baarlamaanka dib u eegis lagu
sameyn doono dhamaanba wixii shuruuc ah ee la xiriir doorashada ee horey loo
gaaray, iyadoo la magacaabayo guddiyo loo
xil saari doono soo diyaarinta qabka howsha doorashada u socon doonto.
“ Sida ugu dhaqsiyaha badan ayuu u fariisinayaa baarlamaanka, sharuuc ayaa
la sameynayaa, gudiyo ayaa jiri doona u xil saaran doorashada iyo sida loo
agaasimayo’’ ayuu yiri Cismaan Cilmi Boqorre.
Waxaa uu intaa ku daray in wixii
go’aano ee ku aadan doorashada ay u taalo Baarlamaanka, isla markaana wax
shaqsi sameeyay howsha lagu wadi doonin, laguna howlgali doono wixii sharuuc ah
ee uu dajiyo baarlamaanka.
Ugu danbeyntii, baarlamaanka 10aad ee Soomaaliya oo ka kooban golaha
shacabka iyo aqalka sare ayaa talada dalka la wareegay, waxaana looga fadhiyaa
in waqti kama dambeys u qabto doorashada Madaxweynaha iyo guddoonka labada
aqal, iyadoo doorashada ay salka la geli doono sanadka cusub ee 2017 oo maalmo
ay ka dhiman yihiin.
C/raxmaan Diini, Hiiraan Online
[email protected]