Madaxweynaha Somalia oo ka Hadlay dagaallada Al-shabaab lagula jiro iyo Qoxootiga Dhadhaab
Jimco,
September 30, 2016 (HOL) — Madaxweynaha Somalia, Xasan Sheekh Maxamuud oo Wareysi siiyay Wargeyska Newsweek, ayaa ka hadlay arrimo ay ka mid yihiin dagaallada
lagula jiro Al-shabaab iyo Qoxootiga ku nool Xeryaha Dhadhaab ee Dalka Kenya.
Xasan
Sheekh, ayaa sheegay in Ciidamada Dowladda Soomaaliya iyo AMISOM ay guulo waaweyn
ka gaareen dagaalka ka dhanka ah Al-shabaab, isagoo Xusay in ay ka saareen 75% Dhulkii ay Al-shabaab ka talin jiray, haatana ay qaybta kale kula
dagaalamayaan.
“Al-shabaab
ahaatan waxay ka talisaa dhul gaaraya 10%, Haatanna Waxaa naga go’an in aan ka
saarno deegaannada ay haystaan,” ayuu Madaxweyne Xasan Sheekh ku yiri
wareysigiisa.
Sidoo
kale, Wuxuu Xusay in Sannadihii u Dambeeyay ay Al-shabaab billowday Weerarro Cusub oo u badan qaraxyo ismiidaamin ah iyo kuwo kale oo gaadmo ah, taasoo uu xusay inay muujinayso inay ku
guul-darreysteen weerarradii tooska ahaa.
Mar
la weydiiyay su’aal ahayd; Waa maxay waxaad u baahan tihiin si aad u
cirib-tartaan Al-shabaab, wuxuuna ku jawaabay inay haatan guulo waaweyn
gaareen, balse ay caalamka uga baaqayaan inay ka caawiso Ciidanka DF iyo kuwa AMISOM
si ay u sii wadaan hawl-gallada ka dhanka ah Al-shabaab.
Qoxootiga Soomaaliyeed ee Dhadhaab;
Waxaa
kaloo Xasan Sheekh la weydiiyay su’aal ahayd; Ma ku raacsan tahay Kenya Go’aankeeda ah in ay Xirayso Xeryaha Qoxootiga Dhadhaab iyo in Qoxootiga Soomaaliyeed ku Nool Somalia Dib loogu celiyo? Wuxuuna kaga jawaabay.
“Waan
uga mahad-celinaynaa xukuumadda iyo shacabka Kenya sidii ay u soo dhaweeyeen
Soomaalidii ka cararay Colaadihii Sokeeye ee dalka ka dhacay, ayna ka Caawiyeen
wixii ay u baahnaayeen oo dhan waana og-nahay culeyska ay keeni karto marti-gelinta
qoxootigaas faraha badan.”
Isagoo intaas ku daray. “Inkastoo weli ay Somalia weli Caqabado ka jiraan, Haddana waqtigaan waxaa loo baahan yahay in Qoxootigu Dhadhaab ku nool ay Dalkooda kusoo
laabtaan, ayna ka Qayb-qaataan dib u dhiska dalkooda. Balse waxaan u
baahannahay in dib u celinta qoxootiga ay noqoto mid si tartiib-tartiib ah u hir-gasho.
Waxaana Kenya mar kale uga mahad-celinayaa gacantii ay dadka Soomaaliyeed
siiyeen muddadii ay qoxootiga ku ahaayeen dalkooda, taasina waxay keenaysaa in
Kenya ay baal-dahab ah ka gasaho taariikhda Somalia.”
Ugu
dambeyn, Madaxweyne Xaan oo ka mid ah Murashaxiinta doonaya in ay u Tartamaan Sannadkan Xilka Madaxweynaha Somalia, ayaa sheegay in Dowladdiisu
intii ay jirtay ay horumarro fara badan ku tallaabsatay, balse ma sheegin
waxyaabihii aan u qabsoomin.
Maxamed X. Xuseen, Hiiraan Online
[email protected]
Muqdisho, Soomaaliya