Kulan hordhac u ah shir Berri furmaya oo Khaatumo uga billowday Degmada Balli-cad ee Gobolka Sool
Jimco, September 23, 2016 (HOL) —
Deegaanka Balli-Cad ee Gobolka Sool ayaa waxaa ku Sugan intii badnayd ee maamulka Khaatumo oo uu
ugu horreeyo Madaxwayne Cali Khaliif Galaydh, halkaas uu ka furmay shalay si
hordhac ah shir la iclaamiyay Sabtida berri ahna si buuxda u furmi doona sida
uu noo xaqiijiyay Wasiirka Arrimaha Gudaha Khaatumo, Abshir C/casiis.
Wasiirku wuxuu raaciyyay in
shirkaan loogu yeedhi doono qaybaha kala duwan ee bulshada sida; Madax-dhaqameedka,
Cuqaasha, Culumada, Qurba-joog iyo Aqoon-yahannada Khaatumo oo halkaasi lagu
gaadhi doono wadatashi u dhaxeeya, laguna saari doono wax kasta oo madmadaw ah
oo bulshada iyo maamulka soo kala dhex galay ayna intii badnayd ay soo gaadheen
shirka qaybaha kalana ilaa bari la filayo.
Dhinaca kale Wasiirka warfaafinta
maamulka Axmed X. Cali C/llaahi oo ku sugan
Bali-cad ayaa xaqiijiyay in Prof. Galaydh uu xilka ka qaaday laba ka mid ah Golihiisa
Wasiirrada sida; Wasiirka Arimaha Gudaha, Axmed Maxamuud Dolaal iyo Wasiir-u-dowlaha
Amniga, Faysal Maxamed Xasan Falaalug iagoo u cuskaday qaar ka mid ah qodobada dustuurka
maamulkiisa.
Xil-ka-qaadistan, ayaa muran
ka dhex aloostay maamulka iyo shacabka dirkaba iyadoo mudadii la soo dhaafay ay
si han-jabayeen dadka taageerada u haya maamulka kadib wadahadaladii dhex maray
maamulka iyo Somaliland, in kasta oo madaxwaynaha Khatumo iyo siyaasiyiinba ay
ku sifeeyeen in ay tahay talaabooyin siyaasadeed uu maamulka u taala.
Dhinaca kale, waxaa 20-kii
bishan lagu soo gabagabeeyay deeganka Tuka-rag
shir uga socday Madax-dhaqameedka Gobollada
Sool, Sanaag iyo Cayn, kaasoo lagu lafa-gurayo Arrimo u dhaxeeya isimada
deeganka iyo muranka soo kala dhex galay qaar ka mid ah iyadoo ay sheegeen in mid kan la mid ah uu ka qabsoomi
doono magaalada Buuhoodle ee xarunta Gobolka Cayn 15-ka bisha soo socota,
iyagoo soo saaray qodobo ay ku heshiiyeen.
Si kastaba ha ahaatee, Shirkan
ayaa mudooyinkii u danbeeya loo hanqal taagayay si wayna looga hadal hayaa
deeganada gobolada SSC lamana saadalin karo midhadhalkiisa madaama ay bulshada
qaarkood ku tilmaamayaan mid u af-duuban madaxwayne Galaydh.
Seynab Cabdi Warsame,
Hiiraan Online
E-mail. [email protected]
Laascaanood, Gobolka Sool