Sh. Shariif Axmed oo soo gaaray Muqdisho iyo Waddooyinka Qaar oo laga xiray Taageerayaashiisa (SAWIRRO)
Khamiis, September
22, 2016 (HOL) — Madaxweynihii hore ee Somalia, Sh. Shariif Sheekh Axmed ayaa
soo gaaray Muqdisho, iyadoo Waddada gasha Garoonka Diyaaradaha Muqdisho laga
xiray taageerayaashiisa.
Dadweyne badan oo
taageerayaashiisa ah ayaa lagu arkayay waddada isku xirta garoonka diyaaradaha
Muqdisho iyo isgoyska lambar afar ee Muqdisho, halkaasoo ay buuxiyeen, iyadoo
waddada lagu xiray gaadiidka ciidanka booliiska Soomaaliya.
Sh. Shariif Sheekh Axmed, ayaa
looga adkaaday doorashadii Sannadkii 2012-kii ee uu kusoo baxay madaxweynaha
Somalia ee xilka haya Xasan Sh. Maxamuud, wuxuuna ahaa murashaxii ay isla
galeen tartankii u dambeeyay.
Waxaa lagu wadaa in Sh. Shariif
uu Muqdisho kaga dhawaaqo inuu murashaxiinta u tartamaya xilka madaxweynaha ku
biiro, kuwaasoo uu ku jiro madaxweynaha xilka haya, Xasan Sheekh Maxamuud.
Ugu dabmeyn, Madaxweynihii
hore ee Somalia Sh. Shariif Sh. Axmed ayaa waxaa Muqdisho ugu dambeysay markii doorashadii sannadkii 2012-kii looga guuleystay, isagoo wixii xilligaa ka dambeeyay ku sugnaa dalka dibaddiisa, Waxaana imaashihiisa ay kusoo beegmayso iyadoo lagu wado in toddobaadka soo socda ay billowdaan xulista xildhibaannada cusub ee Somalia.
Maxamed X. Xuseen, Hiiraan Online
[email protected]
Muqdisho, Soomaaliya
