Madaxweyne Xasan oo ku baaqay in la Dhawro Hab-raaca Doorashooyinka Dalka ee 2016-ka
Arbaco, September 21, 2016 (HOL) —
Madaxweynaha Somalia, Xasan Sheekh Maxamuud ayaa mar kale ku baaqay Maanta in la dhawro nidaamka Doorashada ee 2016-ka ee la filayo inay dhawaan Somalia ka dhacdo,
gaar ahaan ilaalinta Xuquuqda musharraxiinta iyo weliba hawl-wadeenada doorashada.
“Waxaa lagu jiraa marxalad Taariikhi ah oo lagu go’aaminayo aayaha Siyaasadeed ee dalka muddo 47-sanno
kaddib. Si fursaddaan ay u noqoto mid waxtar u leh dalka iyo dadka waxaa lagama
maarmaan ah, in la dhowro Hab-raaca Doorashada ay Hoggaaminayaan Guddiyada Doorashooyinka
ee Heer federal iyo heer maamul,’’ ayuu yiri Madaxweyne Xasan.
Sidoo kale, Madaxweynaha
ayaa ku celiyay inay Dowladda Federaalka Somalia, Maamul-goboleedyada iyo Guddiyada
Doorashooyinka Dadban ee heer Federal iyo heer Maamul-goboleed ay ka go’an
tahay in la ilaaliyo Jadwalka Doorashooyinka; sidii lagu heshiiyay.
Bishan September 25-keeda, ayaa
waxaa la filayaa inay bilowdaan doorashooyinka labada Aqal (Aqalka Hoose iyo
Aqalka Sare), iyadoo 25-ka Bisha Oktoobar iyana la dooran doono Guddoomiyaha
Baarlamaanka. Doorashada Madaxweynaha ayaa dhici doonta 30-ka Bisha Oktoobar ee Sannadkan.
Madaxweynaha ayaa hadalkiisa
ku daray in loo baahan yahay in la ilaaliyo lana xurmeeyo xuquuqda
musharixiinta, odayaasha dhaqanka, nabaddoonada, ergada wax dooraneysa iyo
hawl-wadeenada doorashada.
“Dhawrista Hab-raaca Doorashada
waxaa sal u noqonaya in la Xurmeeyo Hannaan kasta oo sax ah oo Doorashada lagu
suuro-gelinayo. Musharraxiinta Xuquuqdooda waxaa ka mid ah inay si nabad ah u
qabtaan ololahooda iyo barnaamijyadooda siyaasadeed ee doorashada. Dimuqraadiyadda
iyo xorriyatul-qowlka mas’uuliyadda ku saleysan ayaa waxay na faraysaa in musharaxiinta
ay noqdaan kuwo si hufan, wadaniyad leh u soo bandhigaan Barnaamijka
siyaasadeed ee ay wataan, iyagoo qiimeynaya duruufaha dalku ku jiro iyo baahida loo qabo Dar-dar-gelinta dib u Heshiisiinta iyo Dib u soo celinta Kalsoonida Shacabka ka
dhexeysa,’’ ayuu hadalkiisa ku yiri Madaxweyne Xasan Sheekh.
Dhanka kale, Madaxweynaha ayaa xusay inuu kalsooni buuxda ku qabo Laamaha Amniga, hadana uu farayo in laamaha ay si buuxda u ilaaliyaan, isla markaana u dhawraan xuquuqda musharixiinta iyo
barnaamijyadooda siyaasadeed.
Ugu dambeyn, Madaxweyne
Xasan Sheekh, ayaa sidoo kale wuxuu Hay’adaha DF Somalia iyo Maamul-goboleedyada
faray inay ka wada shaqeeyaan sidii doorashooyinka ay ku najixi lahayd.
Maxamed X. Xuseen, Hiiraan Online
[email protected]
Muqdisho, Soomaaliya
