Xisbiga Wadani oo Maxkamada Sare u Gudbiyay Dacwo go’aankii Siilaanyo ee doorashada ka dhan ah
Isniin, September 19, 2016 (HOL) —
Xisbiga Mucaaradka ah ee WADDANI, ayaa maanta Maxkamadda sare ee Somaliland u gudbiyey dacwad
ka dhan ah kala saaridda doorashadda iyo muddo kordhin loo sameeyo golaha
Wakiiladda oo ay ku tilmaameen sharci-darro.
Madaxda Xisbiga
WADANI ayaa qoraal dacwadda u gudbiyey gudoomiyaha maxkamadda sare, waxaanay
sheegeen inay ka dacwoonayaan go’aankii madaxweynuhu ku kala saaray doorashadda
madaxtooyadda iyo Wakiiladda oo hore loogu heshiiyey in hal mar wada dhacaan.
“Maxkamadda sare ayaanu u
gudbinay oo sharciga iyo nidaamka ay
xukuumaddu ku tumay iyo waraaqdii madaxweynuhu soo qoray oo aan anagu u
arkayno xisbi ahaan wax dastuurka iyo
sharciga baalmarsan ee golaha Wakiilada loo gudbiyey”ayuu yidhi Xoghayaha guud
ee xisbiga WADANI Maxamed Uur-cadde.
Uur-cadde, ayaa sheegay in si
wanaagsan uu u qaabilay Guddoomiyaha maxkamadda sare, waxaanu yidhi “waxaa aanu
aad iyo aad ugu mahadnaqaynaa, gudoomiyaha maxkamadda sare oo si wanaagsan noo
soo dhoweeyey oo noo qaabilay, anagoo ku kalsoon go’aanku ka gaadho, runtiina
aad ugu hanweynahay in gudoomiyahani yahay gudoomiye ku dhaqmayaa cadaaladda
iyo shuruucda dalka u yaalla oo uu intii uu joogay wax badan ka soo qabtayna,
tana aanu rajaynayno inay noqon doonto mid rajadda Somaliland ee kalsoonadda
cadaaladda inoo soo celiyey”
Xoghayaha guud ee
xisbiga WADANI Maxamed Uurcadde oo la
waydiiyey maadaama uu gudoomiyaha xisbiga Wadani yahay gudoomiyaha golaha
Wakiilada, laakiinse mudadii uu golahaasi joogay aanu samayn xeerarkii lagu soo
dooran lahaa xildhibaanadda Wakiiladda, taasina ay sababtay in la kala saaaro
doorashadda xeerkii lagu dooran lahaa oo wali qabyo ah ee maxaad ku doodaysaan
mar haddii aanu gudoomiyuhu arrintaas samayn waayay, waxaanu xoghayuhu ku
jawaabay “Su’aashaasi waa mid nagu soo noqnoqotay, wax ka jiraana ma jiraan,
gudoomiyaha golaha Wakiilada iyo Wakiiladda wax ku xidhnaa saami qaybsiga
Golaha Wakiiladdu ma jiraan, waxa jiray in maxkamadda sare ay qaraar gaadhay ay
u dirtay golaha Wakiiladda in doorashadaasii golaha Wakiiladda ee 2005-kii hal
mar lagu gallo doorashadda, waxaana xukuumadda amar lagu siiyey in tiro koob ay
samayso, cida ku fashilantay ee hawlihii loo diray ka soo bixi wayday waxay
ahayd xukuumadda ”.
Ugu dambeyntii, Xisbiga WADANI ayaa hore u Taageeray baaqii ay Beesha Caalamku ku cambaaraysay go’aankii madaxweynuhu ku
kala saaray doorashada, isla markaana dib ugu dhigay doorashada golaha
Wakiilada, waxaana laga dhursugayaa jawaabta
ay Maxkamadda sare ka bixin doonto dacwadan.
Barkhad-ladiif M. Cumar,
Hiiraan Online
[email protected]
Hargeysa, Somaliland