Maamulka Jubaland oo Maanta sheegay inay billaabeen Hawl-gallo dhan ka ah Al-shabaab
Isniin, September 19, 2016 (HOL) —
Saraakiisha Maamulka Jubbaland, ayaa sheegay inay Ciidamada maamulkooda ka billaabeen hawl-gallo deegaanno ka tirsan Jubbaland oo ay ka taliso Al-shabaab.
Waxay Saraakiishu intaas ku
dareen, in Ciidamadooda ay Hawl-galladan la kaashan doonaan kuwa AMISOM, iyagoo
xusay inay ujeeddada hawlgalladan yihiin in laga saaro Al-shabaab deegaannada ay
kaga sugan yihiin Jubbaland.
Sidoo kale, Afhayeenka Ammaanka ee maamulka Jubbaland, Axmed Carab ayaa u
sheegay warbaahinta inay jiraan deegaano go’doosan oo ay xoogagga Al-shabaab ku
sugan yihiin.
“Ciidamada Jubbaland, waxay
billaabeen Hawl-gallo ballaaran oo Al-shabaab looga saarayo deegaannada ay kaga
sugan yihiin Jubbooyinka, Ciidanku waxay gaareen dhawaan deegaanka Cabdalla
Biroole oo duleedka Kismaayo ku yaalla, kuwa kalena waxaa u qorsheysan inay ka
saaraan Al-shabaab,” ayuu yiri Axmed Carab.
Dhanka kale, Afhayeenka ayaa
xusay uu in ciidamada AMISOM, gaar ahaan kuwa ka socda Waddanka Kenya ay ka Qayb-qaadanayaan
dadaalada Ammaanka ay ku sugayaan.
Ugu dambeyntii, Maamulka
Jubbaland ayaa dhowr jeer oo hore sheegay in ay Gaari doonaan deegaannada aan
gacantooda ku jirin oo intooda badan ku yaalla gobolka Jubbada Dhexe; sida degmooyinka
Bu’aale & Saakow oo ay Al-shabaab gacanta ku muddo sannado ah.
Maxamed X. Xuseen, Hiiraan Online
[email protected]
Muqdisho, Soomaaliya
