MADAXWEYNE XASAN SHEEKH: Marna ma Ogolaanayno in Taako ka mid ah baddeenna la Qaato
Isniin, September 19, 2016 (HOL) —
Madaxweynaha Somalia Xasan Sheekh ayaa sheegay in aysan Dowladda Federaalka Somalia marna
ka Tanaasuli doonin Taako ka mid ah Badda Soomaaliyeed, xilli maanta ay Maxkamadda Cadaaladda ee Magaalada Hague ka bilaaban doonto dhageysiga Dacwada u dhaxeysa Kenya iyo Somalia.
Xasan Sheekh ayaa sheegay in
kalsooni badan uu ku qabo inay Guuleysanayso DF Somalia, isagoo shacabka
Soomaaliyeed u sheegay in Baddu ay tahay hanti Qaran oo aan marnaba gor-gortan
geli doonin.
“Waxaa Maanta bilaabanaysa Dacwaddii
Badda ee u dhaxeysa Soomaaliya iyo Kenya. Dacwadaas kooxda sharci-yaqaanno Soomaaliyeed
ah ayaa Maxkamadda tagaya, waxaan rabnaa muhiimadda Dacwadda badda iyo dhulka
biyaha ay Soomaaliyeed leedahay inaan xaqiijiyo, taasoo inaanan ogolaan doonin
in la qaato qayb ka mid ah badda Soomaaliyeed,” ayuu hadalkiisa ku yiri Xasan
Sheekh.
Sidoo kale, Madaxweynaha
Somalia ayaa sheegay in markii hore Dowladda Kenya ay arrintaan wada-hadal ka yeesheen,
laakiine ay noqotay in Maxkamad la tago, si la mid ah sida Shuruucda caalamiga ah
qabaan.
Madaxweynaha ayaa mar kale
ku celiyay inay difaaci doonaan Badda Somalia, isla markaana ku doodayaan wixii
shacabka Soomaaliyeed ay xaqa u lahaayeen, iyadoo aanay cid kale la dulmineyn. Wuxuuna
yiri. “Anaga iyi Kenya jaar ayaan nahay, wax khilaaf ahna nagama dhexeeyo,
biyaha annaga ayaa is ka leh, waa Badeena, waana difaaci doonnaa.”
Ugu dambeyn, Madaxweyne
Xasan ayaa habeen hore Sagootiyay Guddiga goob-joogga ka noqonaya
Dacwadda Badda, isagoo kula Dar-daarmay inay Doodda iyo Dacwada Baddu noqdaan
kuwo mira-dala.
Maxamed X. Xuseen, Hiiraan Online
[email protected]
Muqdisho, Soomaaliya
