UNCHR oo beenisay Eedo ay u soo jeedisay Hay’adda Xuquuqda Aaadanaha ee Human Rights Watch
Axad, September 18, 2016 (HOL) —
Hay’adda Qoxootiga Adduunka ee UNHCR ayaa iska fogeysay eedo kaga yimid Hay’adda
xuquuqda Aadanaha ee Human Rights Watch, kuwaas oo la xiriiray dib u celinta
Qoxootiga Soomaalida ee ku jira Xeryaha Dhadhaab ee Kenya.
Raouf Mazou oo ah wakiilka
UNCHR ee dalka Kenya, ayaa sheegay in hay’adda ay si dhaw ula shaqeynaysay Dowladda
Kenya si loo dhawro xuquuqda qaxootiga dib ugu laabanaya dalkooda Somalia,
iyagoo si nabad-galyo ah ugu laabanayay goobihii ay ka yimaadeen markii hore.
Xeryaha Dhadhaab ayaa waxaa
haatan ku nool 300,000 oo qof oo Qoxooti ah, una badan Soomaali, waxaana hay’adda
UNCHR ay gacan ka geysataa buu yiri wakiilku sidii ay dalkooda dib ugu laaban
lahaayeen iyagoo aan la qasbin.
Sidoo kale, Hay’adda HRW
ayaa warbixin ay toddobaadkii hore soo saartay waxay ku sheegtay in Qoxootiga
Soomaalida ee xeryahaas ku jira qaarkood lagu qasbo in ay dalkooda ugu laabtaan
si khasab ah, sidoo kalena aanay helin dhaqaalihii ay dib ugu laaban lahaayeen
ee loo ballan-qaaday.
HRW, ayaa Warbixinteeda ku
xustay in Xukuumadda Kenya ay cadaasi iyo hanjabaado ku hayso qoxootiga xeryahaas
ku jira si ay ugu laabtaan dalkooda, iyadoo dowladda Kenya ay horay us heegtay
inay bisha November ee sannadkan ay xirayso xeryaha Dhadhaab oo dhan.
UNHCR ayaa warbixinteeda ku
xustay in eedaha loosoo jeediyay ay yihiin kuwo aan sax ahayn, iyadoo xustay
inaysan jirin cid lagu qasbo inay Soomaaliya ku laabtaan, balse dadka laabanaya
ay iyagu go’aanka gaareen.
“Waxaan si joogto ah kulamo
ula yeelanaa qaxootiga, sidoo kale saxaafadda ayaan u marinnaa marinaa farriimo
ku baxa afafka Soomaaliga iyo Ingiriiska oo aan ugu sheegeyno in dib u
laabashada aysan ahayn mid khasab ah, balse uu qofku iskiis u dooran karo,” ayaa
warbixinta UNCHR lagu yiri.
Ugu dambeyn, UNHCR ayaa
xustay in iyadoo la tixgelinayo dhibaatooyinka haysta Kenya ay dowladda Somalia
dajisay qorshe dib loogu celinayo Qoxootiga Xeryaha Dhadhaab ku noolaa muddada
rubuc-qarniga ah.
Maxamed X. Xuseen, Hiiraan Online
[email protected]
Muqdisho, Soomaaliya
