Hay’adda Sovoyodo oo Arday la baray xirfado kala duwan u qabatay xaflad Qalin-jabin ah
Jimco, Oktoobar 07,
2016 (HOL) — Hay’adda
Sovoyodo ayaa xaflad qalin jabin ah u qabatay arday isugu jira willal iyo gabdho
bartay xirfado kala duwan ,waxaana munsaabad-dan oo ka dhacday magaalada
Bosaaso ka soo qayb-galay mas’uuliyiin ka tirsan maamulka gobolka Bari iyo kan
degmada Bosaaso.
Agaasimaha hay’ad-dan C/wali Xasan Gooni ayaa goobta
ka sheegay in ardaydan ay barteen xirfadaha kala ah Dawaarka ,Shaqo Guri, soo
Dhaweynta iyo waliba Korontada ,waxaana uu tilmaamay in muddo afar bilood ah ay
xirfad-dan baranayeen.
“Waxaan ku dadaalnay in aan dhalinyarada
Soomaaliyeed shaqo u abuurno ,ilaa iyo hadda waxaa xarunta tababarkeena ka
qalin-jabisay arday badan oo hadda wadanka ka shaqaysta “ ayuu yiri Agaasimaha
oo xusay in qorshahooda uu yahay in dhalinyarada Somaliyeed laga bad-baadiyo
tahriibka.
“Waa dufcad-dii labaad oo sanadkan qalin-jabisa ,
waxaana ay isugu jiraan 30 gabdhood iyo 20 wiil oo aan ku rajo- weyn-nahay in ay
dalka wax badan u qabtaan “ ayuu mar kale yiri Gooni oo u mahad-celiyay
hay’ad-da SOCCO oo mashruucan kormeere ka ah.
Mas’uuliyiin ay ka mid yihiin gudoomiye ku xigeenka
labaad ee gobolka Bari , aqoon-yahano ,waxgarad,culumaa’udiin iyo waalidiinta
ardayda qalin-jabinaysa ayaa goobta ku sugnaa ,waxaana aad looga hadlay
kaalinta xirfadaha gacanta ay ku leeyihin horumarinta bulshada.
“Waxaan idiin sheegayaa in uu jiray oday dadka
deegaanka ah oo wiil uu ka tahriibay, markii uu tabar u waaayay bixinta
qarashaadkii laga soo dalbaday waxa uu gaday halkii guri ee magaalada uu ku
lahaa , hadda odeygii waxaan ku darnay dadka barakacayaasha ah , marka ka
digtoonaada in aad waalidkiin kaliftaan “
ayuu yiri xildhibaan Maxamed Colow oo la hadlayay ardayda.
Ugu danbayn, mashruucan oo ay ka faa’idaysteen arday
kor dhaafaysa boqol ayaa waxaa maal-galinaysa hay’adda USADF , waxaana ilaa iyo
hadda la sheegay in arday badan uu ka baajiyay tahriibkii ay wadanka kaga tagi
lahaayeen.
Faysal M. Hassan
[email protected]