Madaxweynaha Somalia oo booqasho ku Gaaray Maanta Magaalada Baydhabo ee Gobolka Bay
Isniin,
Oktoobar 03, 2016 (HOL) — Madaxweynaha Somalia, Xasan Sheekh Maxamuud iyo Wafdi
uu hoggaaminayo, ayaa maanta safar aan lasii shaacin ku tagay degmada Baydhabo ee
Gobolka Bay oo ah xarunta KMG ee maamul goboleedka Koonfuur-galbeed.
Xasan
Sheekh oo qaybaha bulshada kula hadlayay Baydhabo ayaa sheegay in ujeeddada socdaalkiisa
uu yahay dar-dar-gelinta Hawlaha Doorashooyinka Sannadkan 2016-ka ka dhici doona
deegaannada maamul-goboleedyada.
“Ujeeddada
booqashadeyda Baydhabo waa inaan maamulka iyo shacabka Koonfuur-galbeed ku
dhiirri-gelinno in la dardar-geliyo hawlaha doorashada 2016, lagana shaqeeyo
in si hab-sami leh doorashadan taariikhiga ah ay inoogu qabsoonto. Baaqaasna
waa mid aan dadka Soomaaliyeed oo dhan u jeedinayo. Ujeeddada labaad waxay
tahay inaan mar kale ku baaqo, idinna faro in qoondada haweenka ee labada Aqal-na
la dhaqan-geliyo, Maadaama go’aankaas uu yahay siyaasad Qaran oo khuseysa Soomaalida oo
dhan,” ayuu yiri Madaxweynaha Xasan Sheekh.
Sidoo
kale, Madaxweynaha ayaa xusay in Somalia ay horay u dhaqaaqday, uuna filayo in
dhallinyarada iyo haweenka u hanqal taagaya inay kuraasta labada aqal u
tartamaan ay door-weyn ka qaadan doonaan safarka dowlad dhisidda cusub ee
Soomaaliya.
Madaxweyna
Xasan Sheekh ayaa ugu baaqay shacabka Soomaaliyeed inay iska ilaaliyaan
khilaafaadka, kala shakiga iyo cabsida dhexdooda ah, ayna u midoobaan in waddanka
ay ka dhacaan Doorashooyinka Dadban ee lagu heshiiyay si loo abuuro kalsooni
sal-adag leh oo shacabka ka dhexeysa.
“Doorashada
sannadkan 2016-ka - waa tallaabo taariikhi ah oo dalka loogu diyaarinayo
doorashooyin qof iyo cod ah oo Dalka ka dhaca sannadka 2020-ka. Waxaa hadafkeennu
yahay inaan dhisno Somalia Cusub oo ku saleysan dimuqraadiyad iyo wada-oggol,’’
ayuu mar kale yiri Madaxweyne Xasan.
Ugu
dambeyn, Magaalada Baydhabo ee xarunta Gobolka Bay ayaa waxay noqonaysaa
deegaankii ugu horreeyay ee maamul-goboleedyada dalka ee lagu wado inay toddobaadka
soo socda ka billowdaan doorashooyinka lagu soo xulayo xildhibaannada cusub ee
aqallada baarlamaanka Somalia oo uu booqdo madaxweynaha Soomaaliya.
Maxamed X. Xuseen, Hiiraan Online
[email protected]
Muqdisho, Soomaaliya