Dibadbax Roob-doon ah oo Madaxda Puntland ay ka Qayb-galeen oo ka dhacay Garoowe (Sawirro)
Isniin,
Oktoobar 03, 2016 (HOL) — Bannaan-bax Roob-doon ah, ayaa maanta lagu Qabtay Dulleedka
Magaalada Garoowe ee xarunta Puntland, kaddib markii Wasaaradda Cadaaladda
Puntland ay horay u iclaamisay in degmooyinka Puntland oo dhan ee laga Roob-doono.
Madaxweyne
ku xigeenka Puntland, Madaxda Wasaaradaha, Agaasimayaasha, Wax-garad, Haween iyo Dhallinyaro, Siyaasiin iyo Qaybaha kale ee Bulshada ayaa ka
qayb-galay isku-soo-baxan roob-doonka, kaasoo ALLE looga barayay in uu kulaylka
ka Duqaado ummadda k nool Deegaannada ay Abaartu ku dhufatay.
Intii
lagu gudo-jiray bannaan-baxaan Roob-doonka ah ayaa waxaa ka hadlay Culummo, Isimo,
Aqoon-yahanno, Madaxweynii hore ee Puntland C/raxmaan Faroole iyo xubno kale, kuwaasoo Shacabka Soomaaliyeed
ee Abaaruhu ku yeesheen saameynta ugu duceeyay in ALLE uu ka dul-qaado kuleylka
uuna ugu deeqo Raxmaddiisa.
Wasiirka
Cadaaladda Puntland, Saalax Xabiib Jaamac ayaa isna ka codsaday Ummadda
Soomaaliyeed inay is-cafiyaan, isku naxriistaan, si RABBI uu ugu naxriisto una
siiyo raxmaddiisa. Wuxuuna intaa ku daray inay jiraan maanta dad badan oo
dulman iyo kuwo gaajoonaya oo u baahan in laga caawiyo.
Sidoo
kale, Wasiir ku xigeenka Arrimaha Gudaha Puntland, C/llaahi Xaashi Qoob-deero
oo isagana ka hadlay dibadbaxa ayaa sheegay in meelo badan oo Puntland ka mid ah
maanta laga roob-doonay, kuwa dhimanna berri laga bannaan-bix idoono si ALLE
looga baryo.
Dhinaca
kale, Madaxweyne ku xigeenka Puntland Cameey iyo madaxweynihii hore ee Puntland
oo Iyana ka hadlay Roob-doonka ayaa ALLE ka baryay inuu ummaddiisa siiyo raxamaddiisa,
iyagoo dhanka kale Soomaaliya u Rajeeyay inuu ka hana-qaado sannadkan isbeddel wanaagsan.
Ugu
dambeyn, Waxaa dibadbaxan Roob-doonka ah soo xiray qaar ka mid ah Isimada iyo culummada
Soomaaliyeed, kuwaasoo goobta ka duceeyay, xilli qorraxadu ay maanta aad u
kululeyd.
Abaadir
C/qaadir Cilmi, Hiiraan Online
E-mail: [email protected]
Garoowe, Puntland - Soomaaliya
