Ergada Shirka Jowhar oo loo Qaybiyay Dastuurka uu yeelanayo Maamulka Hiiraan iyo Sh. Dhexe
Isniin,
Oktoobar 03, 2016 (HOL) — Ergooyinka ka qayb-galaya shirka maamulka gobollada Hiiraan iyo Shabeellada Dhexe loo dhisayo
ee Magaalada Jowhar ka socda, ayaa loo
qaybiyay Dastuurka uu yeelanayo Maamulkaas.
Dastuurkan
oo ah qabyo ayaa wuxuu ka kooban yahay toddoba cutub, kaas oo la doonayo in
ergooyinka shirka ka qaybgalaya ay kazoo talo-bixyaan, si loogu daro waxyaabaha
ka maqan. Waxaana Dastuurkan ku jira astaanta uu yeelanayo maamulka, xudduudihiisa
iyo nidaamka uu ku shaqeynayo.
Sidoo
kale, Ergada ayaa lagu wadaa inay isku raacaan magaca uu yeelanayo maamulka Gobollada
Hiiraan iyo Shabeellada Dhexe, Waxaana Wasaaradda arrimaha gudaha ay dhawaan ugu
baaqday shacabka inay aragtidooda kasoo dhiibtaan magaca iyo astaanta calanka
uu yeelanayo maamulka cusub ee loo dhisayo gobolladan.
Xoghayaha
joogtada ah ee Wasaaradda Arrimaha Gudaha Soomaaliya Yaxye Cali Ibraahim, ayaa
sheegay in toddobaadkan ay ku Ansixin doonaan Qabyo-qoraalka Dastuurka, si loo
gudo-galo dhameystirka Maamulka Labada Gobol oo qorshihiisu yahay bartamaha
bishan lagu jiro in la doorto Madaxweynaha uu yeelanayo maamulkan.
Dhanka
kale, Wasaaradda Arrimaha Gudaha Somalia ayaa ku guuleysatay inay qanciyo
ergada ka qeyb galaya shirka jowhar, kaddib markii maalin ka hor-isaga baxeen, markii
lagu wargeliyay in aanay wax dhaqaale ah qaadan doonin.
Odayaasha-dhaqanka
ee kasoo jeeda gobollada maamulkan loo sameynayo, ayaa ku hawlan soo xulista xildhibaannada
uu yeelanayo maamulka labada gobol oo weli uu muran ka taagan yahay dhismihiisa.
Ugu
dambeyn, tallaabadan ayaa waxay kusoo beegmaysaa kaddib kulan ku dhexmaray
shalay Magaalada Baladweyne Odayaasha-dhaqanka ee Gobolka Hiiraan iyo Wafdi ka
socda Dowladda Soomaaliya kaasoo looga hadlay shirka ka socda Jowhar ee lagu
dhisayo maamulka.
Maxamed X. Xuseen, Hiiraan Online
[email protected]
Muqdisho, Soomaaliya