Axad, July 24, 2016 (HOL) — Madaxweynaha Puntland, C/wali Maxamed Cali Gaas ayaa bogaadiyay cayaaraha gobollada ee Muqdisho ka socda hadda, isagoo xusay inuu u rajeynayo in koobkaas ay ku guuleysan doono kooxda Puntland ka socota.
C/weli Gaas, wuxuu sheegay in Cayaarahani ay qayb weyn ka qaataan is-dhex-galka Bulshada iyo Nabadda, sidoo kalena Dhalilnyarada ay ka Maaweeliyaan falalka xun-xun, sida maandooriyaha iyo tahriibka.
"Waxaan hambalyeynayaa Xulka Puntland oo guul weyn cayaarahan kasoo hooyay, isla markaana Final-ka kasoo baxay, waxaana rajeynayaa inay ku guuleysan doonaan koobka," ayuu hadalkiisa ku daray Madaxweyne Gaas.
Sidoo kale, Madaxweynaha Puntland ayaa sheegay inuu cayaartoyda Kooxda Puntland u mahad-celinayo, isla markaana uu rajeynayo inuu kooban kusoo degi doono Garoowe oo ah xarunta Puntland.
Ugu dambeyn, Isniinta Berri ah ayaa lagu wadaa in cayaar xiiso badan ay ku dhex-marto cayaartoyda Puntland iyo Jubbaland garoonka Banadir Stadium, cayaartaas oo la filayo inay ma'suul kala duwan ka qayb-galaan.
Maxamed X.Xuseen, Hiiraan Online