Xukuumadda Washington oo Malaayiin Doollar ku bixinaysa Xoojinta Waxbarashada Somalia
Arbaco, August 31, 2016
(HOL) — Xukuumadaha Somalia iyo Mareykanka ayaa ku kala saxiixday Muqdisho heshiis
lagu horumarinayo Waxbarashada Somalia, iyadoo dowladda Mareykanka ay ballan-qaadday
inay ku bixinayso Waxbarashada Somalia lacag dhan 64-milyan oo doollarka
Mareykanka ah.
Heshiiskan waxaa Dowladda
Maraykanka u saxiixay Safiirka Dalka Mareykanka, Stephen Schwartz iyo kaaliyaha maamulka
Afrika ee hay’ada USAID, Linda Etim, iyadoo uu dhanka dowladda Dowladda Somalia
uu u saxiixeen Wasiirka Waxbararashada xukuumada Somalia, C/qaadir Cabdi Xaashi iyo
Wasiirka Maaliyadda Somalia, Maxamed Aadan Ibraahim.
Mas’uuliyiinta Xukuumadda
Washington u saxiixay heshiiskan ayaa xusay inuu mashruucan yahay mid lagu
kobcinayo Waxbarashada Soomaaliya - iyagoo sheegay inay ka go’an tahay horumarinta
aqoonta sare ee Soomaaliya.
Dhanka kale, Wasiirka waxbarashada
Xukuumadda Soomaaliya ayaa dhankiisa sheegay in mashruucan uu yahay mid aad loogu
baahnaa, wax badanna ka qaban doono Waxbarashada dalka.
”Heshiiskaan muhiim ayuu u
yahay Somalia, Dadaallo badan ayaana ku bixinay sidii uu u hirgeli lahaa, waxaana
uga mahad-celinaynaa Hay’ada USAID Taageerada ay mar walba la garab-taagan
tahay Somalia,” ayuu yiri C/qaadir Cabdi Xaashi.
Ugu dambeyn, Tan iyo markii
uu dalku burburka galay waxaa si aad ah Hoos ugu dhacay tayadii Waxbarashada
dalka, inkastoo ay jiraan Dadaallo la bixiyay oo si sare loogu qaado aqoonta
dalka.
Maxamed X. Xuseen, Hiiraan Online
[email protected]
Muqdisho, Soomaaliya
