SAWIRRO: Danjire Madeira oo Beesha Caalamka ugu baaqay inay Kordhiyaan Taageerada Somalia
Talaado, August 30, 2016
(HOL) — Ergayga Ururka Midowga Afrika ee arrimaha Somalia, Danjire Francisco Madeira,
ayaa Beesha Caalamka ugu baaqay inay kordhiyaan Taageerada ay siiyaan Ciidamada Qaranka Somalia, si ay awood ugu yeeshaan la dagaallanka xoogagga Al-shabaab.
Dajire Madeira oo ka
hadlayay kulan lix maalmood socday oo ay ka qayb-galeen taliyeyaasha qaybaha ciidamada
AMISOM iyo kuwa Ciidanka Somalia ayuu wuxuu xusay in Somalia ay soo kaabanayso
una baahan tahay in gacan la siiyo.
“Waxaanu doonaynaa inaan iska
kaashanno hawl-gallada, sirdoonka iyo sidoo kale fulinta hawlaha lagama
maarmaanka ah ee aan halkan u joogno dhammaanteen,” ayuu yiri Danjire Madeira
oo intaas ku daray. “Beesha caalamka waxaan ka rabnaa inay xoojiyaan caawinta ciidanka
qalabka sida ee Soomaaliya, si ay awood buuxda ugu yeeshaan la dagaalanka Al-shabaab.”
Sidoo kale, Madeira ayaa
sheegay in dhawaan la hirgelin doono xero tababar oo ay ugu magacdareen [Guul-wade],
taasoo uu xusay inay u baahan tahay in qalabka iyo waxyaabaha kale ee lagama
maarmaanka ah laga caawiyo, si ay u soo saarto ciidammo hawlgallo gaar ah fulin
kara.
Dhanka kale, Danjiraha ayaa
sheegay inuu qorshe la doonayo in ciidamada Somalia ay qayb uga qaataan kuwa AMISOM
ee Soomaaliya a socda, kuwaasoo uu xusay in tiradoodu ay tahay 10,900 oo
askari.
Abaanduulaha ciidamada
xoogga dalka oo isagana goobta ka hadlya ayaa sheegay in ciidamada Somalia ay
diyaar u yihiin inay ciidamada AMISOM qayb kala qaataan hawlgallada lagula
dagaalamayo Al-shabaab.
Ugu dambeyn, kulankan ayaa
wuxuu ka mid noqonayaa kulammo dhawr ah oo ay yeesheen saraakiisha ciidamada
dowladda Somalia iyo kuwa AMISOM, kuwaasoo ka ah qayb qorshayaasha lagu
xoojinayo ciidamada xoogga dalka Soomaaliya.
Maxamed X. Xuseen, Hiiraan Online
[email protected]
Muqdisho, Soomaaliya
