Madaxweynaha DF oo Shir-madaxeedka Afrika iyo Jabaan uga Qayb-galaya Nairobi (SAWIRRO)
Jimco,
August 26, 2016 (HOL) — Madaxweynaha Somalia, Xasan Sheekh Maxamuud iyo wafdi
uu hoggaaminayo ayaa gaarey Magaalada Nairobi ee dalka Kenya, halkaasoo ay kaga
qeybgalayaan shir-madaxeedka 6-aad ee Dalalka Afrika iyo Japan ee TICAD (Tokyo
International Cooperation with Africa Development).
Dowladda
Japan ayaa shirkii ugu horeeyay ee TICAD waxay ku qabatey magaalada Tokyo,
sannadkii 1993-kii, waxaana ujeeddadiisu ay ahayd kobcinta horumarka Afrika,
nabadda iyo amniga, iyadoo diiradda la saarayo xoojinta xiriirka labada dhinac,
iskaashiga iyo wax wadaqabsiga.
Kulankaan ayaa
waxaa ka soo qeybgalaya dhammaan madaxda Afrika iyo Japan, waxaana labada
maalmood ee uu socdo diiradda lagu saari doonaa maalgashiga Afrika, fursadaha
ganacsi ee labada dhinac dhexmaraya iyo ka faa’ideysiga kheyraadka labada
dhinac.
Soomaaliya
ayaa horey uga qeybgashey shirkii TICAD ee 2013-kii, waxaana sannadkan la
filayaa in Madaxweynaha iyo wafdigiisa ay kulamo gaar ah la yeeshaan madaxda
Japan iyo kuwa kale ee qaaradda Afrika ka socda.
Waa markii
ugu horeysay ee shirkan lagu qabto qaaradda Afrika, iyadoo shirkii kan ka
horeeyay ee ka dhacay magaalada Tokyo lagu heshiiyey in shir madaxeedka TICAD
martigelintiisa ay is weydaarsadaan dalalka Afrika iyo Japan.
Ugu dabmeyn,
Japan ayaa ka mid ah waddamada iskaashiga dhaw la leh Qaaradda Afrika, iyadoo
dhawaan xoojisay xiriirka iyo is-kaashiga kala dhexeeya Waddamada Qaaradda
Afrika.
Maxamed X.
Xuseen, Hiiraan Online
[email protected]
Muqdisho, Soomaaliya
