50 Qof oo ku Dhaawacmay Qaraxyadii Todobaadkan ka dhacay Gaalkacyo oo wali lagu dabiibayo Isbitaalka GMC
Khamiis, August 25 2016 (HOL) -Isbitaalka GMC oo hoostaga jaamacadda Global Science
University ayaa waxaa ka socda dadaallo lagu dabiibayo 50 qof oo dhaawacyo kala
duwan ay ka soo gaareen qaraxyo horaantii todobaadkan gil-gilay magaalada
Gaalkacyo ee xarunta gobolka Mudug.
Madaxweyne ku xigeenka Puntland Cabdi xakiin Xaaji Cumar
iyo mas’uuliyiin uu kamid yahay gudoomiyaha barlamaanka Axmed Cali Xaashi iyo
saraakiil sar-sare oo ka tirsan laamaha dowladda ayaa dhaawacyadan siyaabo kala
duwan ugu booqday isbitaalka.
“Tirada dhaawacyada waxaa kordhiyay awood-da qaraxyadii dhacay
,markii hore tirada hadda aan la tacaalaynno mid ka yar ayaa naloo keenay “
ayuu yiri Cabduraxmaan Axmed oo kamid ah howl-wadeenada Jaamacadda gacanta ku haysa
dhaawac-yadan.
“Dowladda waxaan ka rajaynayaa in kaalin wacan ay ku
yeelato dabiibka dadka dhaawac ah ee jiifa cisbitaaalkeena ,waxaana ay isugu
jiraan kuwa qaba dhaawacyo culus iyo kuwa qaba dhaawacyo fud-fudud “ ayuu mar
kale yiri Cabduraxmaan.
Wali ma jiro wax war ah oo ka soo baxay dowladda
Puntland oo ku aadan in dhaawac-yadan loo qaadi doono dalalka dariska ah si
halkaa loogu soo dabiibo ,iyadoo taa badalkeed la dhigay cisbitaalo uu ka mid yahay GMC.
Ugu danbayn, Amniga magaalada Gaalkacyo ayaa aad loo
aadkeeyay ,waxaana ku sii qul-qulayay Gaalkacyo madax kala duwan oo ka tirsan Puntland
,iyadoo ay jiraan dad lagu soo qab-qabtay howl-galladii dhacay.
Faysal M.Hassan
[email protected]