HADLIYE: Somalia kuma jirto Dalalka Ciidanka Nabad-Ilaalinta ah u Diraya Koonfurta Suudaan
.jpg)
Khamiis, August 25, 2016 (HOL) – Wasiirka Arrimaha Dibadda Somalia,
C/salaan Cumar Hadliye ayaa beeniyay warar sheegayay in Somalia ka mid tahay
dalalka Ciidamada u diraya dalka Koonfurta Sudan oo ay colaado ka taagan yihiin.
Hadliye ayaa sheegay inaysan Somalia ciidammo u dirayn Koonfurta
Suudaan, isagoo yiri, “Ciidankeenu kuma jiraan ciidamada loo dirayo Koonfurta
Sudan, waxaa jiri doona ciidamo ka socda Itoobiya, Uganda iyo kuwa kale oo loo
diri doono.”
Kulan ay madaxda Ururka IGAD ku yeesheen bishan magaalada
Addis Ababa ayay uga Hadleen Xaaladda dalka Koonfurta Suudaan, qorshaha ciidamo
nabad ilaalin loogu dirayo waddankaas iyo sidii xasilloonida loogu soo celin
lahaa.
Dalka Koonfurta Suudaan waxaa ka jiray dagaallo sokeeye oo
bilowday dhammaadkii Sannadkii 2013-kii, kaddib markii Af-gambi dhicisoobay oo
la doonayay in Xukunka lagaga tuuro Madaxweynaha Waddanka adduunka ugu da’da yar
Salva Kiir.
Ugu dambeyn, Bishii la soo dhaafay ee ayaa waxaa magaalada
Juba ka dhacay iska-horimaadyo culus oo u dhexeeyay ciidammo taabacsan
Madaxweynae Salva Kiir iyo ku xigeenkiisii hore Reik Machar oo hadda lagu daweynayo
Magaalada Khartuum ee Xarunta dalka Suudaan.
Maxamed X. Xuseen, Hiiraan Online
[email protected]
Muqdisho, Soomaaliya
