SAWIRRO: Jen. Maxamed Cali Samatar oo Maanta lagu aasay Muqdisho iyo Madaxda Dowladda oo ka Qayb-galay
Khamiis, August 25, 2016 (HOL) - Allaha u raxmadee Jen.
Maxamed Cali Samatar oo dhawaan dalka Mareykanka ku geeriyooday ayaa maanta lagu
aasay Muqdisho, waxaana aaskiisa ka qayb-galay madaxda ugu sarreysa dalka iyo
mas’uuliyiin kale.
Jen. Samatar oo xilal kala duwan kazoo Qaybtay Dowladdii hore ee Somalia ayaa lagu
aasay Dhismaha Wasaaradda Difaaca Somalia oo uu mar ka ahaa wasiir, waxaana
intii aaskiisu socday aad loo adkeeyay amniga guud ee Magaalada Muqdisho iyo
Hareeraha Wasaaradda Gaashaandhigga.
Salaaddii Janaasada ayaa waxaa ka qayb-galay Madaxweyne
Xasan Sheekh Maxamuud, Guddoomiyaha Baarlamaanka Somalia, wasiirro,
xildhibaanno iyo madax kale oo fara badan, waxaana halkaas hadallo ka jeediyay
madaxda dowladda Somalia qaarkood.
Waxaa kaloo mas’uuliyiintii aaska goobjoogga ka ahaa ka mid
ahaa; Madaxweynayaasha Maamullada Jubbaland Axmed Madoobe iyo Koonfur-galbeed
Shariif Xasan Sheekh Aadan oo ka hadlay taariikhdii uu lahaa Jen. Maxamed Cali
Samatar.
Ugu dambeyn, Mas’uuliyiintii ka hadlay Aaska ayaa waxay
tacsi u direen ehellada, qoyskii iyo asxaabti uu marxuumku ka baxay, iyadoo
isagana ALLE uga baryay Janno iyo Naxariis. Wuxuuna ka mid noqonayaa tiro mas’uuliyiin
ah oo horay loogu aasay Muqdisho.
Maxamed X. Xuseen, Hiiraan Online
[email protected]
Muqdisho, Soomaaliya
