Dibad-baxyo Cadaalad loogu raadinayo Cabdiraxmaan Cabdi oo ka dhacay Magaalooyin kala duwan oo Canada ku yaala
Khamiis, August 25 2016 (HOL) -Dhaq-dhaqaaqa black lives Matter ayaa dibad-baxyo si weyn loo dareemay ku qabtay ilaa todobo
magaalo oo ka tirsan Canada ,kuwaasi oo looga soo horjeeday dil magaalada Ottowa
loogu gaystay Cabdiraxmaan Cabdi oo ahaa 37 sano-jir Somali ah oo haystay
dhalashada Canada.
Dibad-baxayaal sitay boorar lagu dalbanayo in cadaalad
loo helo kiiska Cabdiraxmaan ayaa si weyn looga dhex-arkayay dhamaan mudaharaad-yadii
dhacay ,waana kacdoondki ugu weynaa oo
bulshada rayidka ah ee Canada ay ka qayb-qaadato.
Xarunta weyn ee booliska magaalada Ottowa ayaa waxaa isugu
yimid boqolaal dadweyne ah oo ka caraysnaa falka lagula kacay Cabdiraxmaan
Cabdi ,kaasi oo dilkiisa loo haysto labo kamid ah booliska magaaladaas.
“ Dadka madow-ga ahi waa ay ka war-qabaan in dhacdooyinka
looga soo horjeedo iyaga aysan u dhicin bilaa sabab ,waxaan hadda xal u
raadinaynaa arin ka dhacday Ottowa , macno ma samaynayso halka aad kaga
nooshahay Canada ,tani oo kale anba waa ay igu dhici karta “ ayuu yiri Rodney
Diverlus oo ah asaasaha dhaq-dhaqaaqa Black lives Matter ee Toronto.
Dhaq-dhaqaaqa BLM
ee magaalada Toronto ayaa si dhow ula
socday baaritaanka lagu hayo kiiska Cabdiraxmaan Cabdi oo laamaha aminga ay
sheegeen in dhamaystirkiisa ay qaadan karto muddo bilo ah.
24-tii bishii la soo dhaafay booliska magaalada Ottowa
ayaa sheegay in Cabdiraxmaan uu khash-khashaad ku kula kacay qof dumar ah gudaha
goob lagu qaxweeyo ,kuna tilmaamay in uu qabay xanuun dhanka maskaxda ah oo
aan wali la shaacin.
BLM ayaa doonaysa in la maxkamdeeyo laba askari oo loo
haysto dilka Cabdirixmaan ,isla markaana warbixin laga soo saaro sababaha
rasmiga ah ee keenay geeridiisa ,inkastoo boolisku uusan inta badan shaacin
warbixinada caynkan oo kale ah.
“Dhamaan dadka u dhashay Canada waxa ay xaq u leeyihiin
in ay dhigaan dibad-baxyo si nabad ah u dhaca “ ayaa lagu yiri war ka soo baxay laanta
u xil-saaran baarista kiiska Cabdi-rixmaan oo si weyn looga dareemay guud ahaan
dalka Canada.
Iyadoo uu jiro cadaadis saaran booliska Canada ayaa
dhawaan qareenka Ontario Mdeliene Meileur waxa uu sii daayay warbixin ka kooban
toban bog oo sharaxaysay toogasho ay booliska Toronto u gaysteen Andrew Loku oo
ahaa 45-sano jir.
Ugu danbayn dibax-yadan lagu dalbanayay cadaalad u helo
Cabdiraxmaan Cabdi ayaa ka dhacay magaalooyinka kala ah Ottowa ,Hamilton Kitchener,
, Edmonton ,Winnipeg ,, iyo waliba Waterloo,waxaana la qorsheeyay in ay sii socon doonaan dibad-baxyadan inta laga xalinayo howshan.
Faysal M. Hassan
[email protected]