Kooxo hubeysan oo Muqdisho siyaabo kala duwan ugu dilay Sarkaal ka tirsan Millateriga iyo Askari
Arbaco,
August 24 2016 (HOL) – Kooxo hubeysan ayaa maanta siyaabo kala duwan ugu dilay
Muqdisho Sarkaal sare oo ka Tirsanaa Ciidanka Millateriga Soomaaliya iyo Askari
ka tirsan ciidamada ciidanka booliiska Soomaaliya.
Sarkaalka
la dilay oo lagu magacaabi jiray, Yaxye Aadan Cali ayaa waxay lagu dilay saakay
degmada Dharkeynleey ee gobolka Banaadir, iyadoo kooxihii dilay oo ahaa kuwo ku
hubeysan bastoolado ay si fudud goobta uga baxsadeen.
Wararka
ayaa sheegaya in sarkaalkan la toogtay xilli uu ku socday shaqadiisa, isla
markaana ma jirto cid loo qabtay dilkiisa, mana jirto hadal ay dilka
sarkaalkaan ay ka soo saareen hay’adaha
amniga dowladda Somalia.
Dhanka
kale, Askari ka tirsanaa ciidanka booliiska Somalia ayaa lagu dilay maanta
gudaha suuqa bakaaraha ee Muqdisho, waxaana sidoo kale lagu dhaawacay askari
kale oo ka tirsan ciidanka canshuuraha ee Dowladda Hoose ee Xamar.
Askartan
ayaa waxaa weeraray lix nin oo bastoolado ku hubeysanaa, iyadoo askar kale oo
la socday Askariga la dilay iyo kan la dhaawacay ay iyaguna Toogasho ku dileen
mid ka mid ah kooxihiii hubeysnaa ee dilka geystay, sida uu Warbaahinta u
xaqiijiyay afhayeenka maamulka Gobolka Banaadir, C/fataax Cumar Xalane.
Ugu
dabmeyn, Qof ayaa ku dhintay saddex kalena way ku dhaawacmeen, kaddib markii
xalay kooxo hubeysan weerar bambaano ku weerareen Guri uu deggenaa wasiir u
dowlaha gaashaandhigga Soomaaliya, Maxamed Cali Xagaa iyo Xubno ka tirsan
baarlamaanka Soomaaliya.
Maxamed X.
Xuseen, Hiiraan Online
[email protected]
Muqdisho, Soomaaliya