Sabti, August 13, 2016 (HOL) —Wasiirka haweenka iyo Xuquuqul-Insaanka Somaliya
Sahro Maxamed Cali Samatar ayaa soo dhaweysay kaalinta haweenka Soomaaliyeed
laga siiyay arimaha siyaasadda dalka ,waxaana lagu wadaa in doorashada sanadkan
la qabanayo ay ka helaan saami dhan 30%.
Shir-weynihii Qaran ee looga hadlayay doorashooyinka
Soomaaliya ayaa lagu saxiixay in qoondada haweenka ay ahaan doonto lama
taab-taan ,isla markaana ay xubno muhiim ah ka heli doonaan dowladda iyo aqallada
kale ee sharci dajinta.
Wasiirrad-da ayaa ku tilmaamtay arintan horumar weyn oo ku
soo kordhay siyaasadda Somalia ,waxaana hadalkan ay ka sheegtay shir-weynaha
haweenka oo shalay oo Jimco ahayd lagu qabtay magaalada Muqdisho ee caasimadda
Somaliya
“Shirkii heer qaran ayaa go’aamiyay in haweenku ay ka heli
doonaan kuraas dhan 30% labada aqal ee
dowladda “ ayey tiri Sahro oo tilmaamtay in haweenka ay kaalin weyn ku leeyihiin
dib u dhiska dalka oo ka soo kabanaya colaado sokeeye.
Ku xigeenka Ergayga Midowga Afrika ee Somaliya Lydia Wanyato
ayaa ugu baaqday dumarka in ay ka faa’idaystaan fursaddan ,isla markaana ay balaariyaan
kaalinta ay ku leeyihiin isbadallada
siyaasadda ee Soomaailya.
“Waxaa la joogaa waqti aysan dumarka Soomaali seegi karin
,saacaddu waa ay socotaa ,waa in ay istaagaan” ayey tiri Wanyato oo sheegtay in
Midowga Afrika uu dowladda Somalia ugu mahad-celiyo kaalinta haweenka laga siiyay siyaasadda.
Ugu danbayn , Somalia ayaa yeelan doonta barlamaan cusub
inta u dhaxeysa 24-ta bisha sagaalaad
ilaa iyo bisha tobonaad tobankeeda halka sidoo kale loo codayn doono madaxweyne
cusub bisha tobonaaad ,waxaana jadwalkan lagu saxiisay shirkii heer qaran ee
Muqdisho.
Faysal M.Hassan
[email protected]
