Wararka Maanta: Jimco, May 19, 2015-Maamulka Puntland oo amar ku bixisay in la xiro Xafiisyada SNTV uu ku Leeyahay Puntland

Maamulka Puntland oo amar ku bixisay in la xiro Xafiisyada SNTV uu ku Leeyahay Puntland

Talaado, May 19, 2015 (HOL) —Maamulka Puntland ayaa amray in la xiro dhammaan xafiisyada Telefishinka Qaranka (SNTV) uu ku leeyahay Puntland.

Qoraal kasoo baxay Wasaaradda Arrimaha Gudaha Puntland oo uu ku saxiixan yahay wasiir ku-xigeenka wasaaradda Cabdullaahi Xaashi Qoob-deero, ayaa lagu sheegay in sababta telefishinka loo xiray tahay kadib markii uu labo maalmood kahor baahiyey war been abuur ah oo ku saabsan qaabka Puntland ugu gurmatey qaxootiga kasoo qaxaya dalka Yemen.

Wakiillada Telefishinka Qaranka ee magaalooyinka Garowe iyo Bosaso, Cabdi Xasan Awoowe iyo Axmed Naasir ayaa HOL u sheegay in lagu soo wargeliyey inaysan shaqeyn karin ilaa amar dambe.

Ururka Saxafiyiinta Puntland MAP ayaa cambaareeyey tallaabada dowladdu ku xirtey xafiisyada SNTV, wuxuuna dowladda ugu baaqay inay arrintan sida ugu dhaqsaha badan dib u eegis ugu sameyso.

AQRISO AMARKA LAGU XIREY TELEFISHINKA

Maxamed Salaad Xaaji Dirir, Hiiraan Online
[email protected]
Boosaaso, Soomaaliya