3/19/2024
Today from Hiiraan Online:  _
Wararka Maanta- Talaado, Jan 14, 2014
Madaxweyne Gaas oo si Rasmi ah Xilka ula Wareegay (SAWIRRO)

Talaado, Janaayo 14, 2014 (HOL) — Magaalada Garoowe ee xarunta maamulka Puntland waxaa maanta ka dhacday munaasabad ay xilalka kula kala wareegayeen madaxweynaha -dhowaanta la doortay- ee Puntland C/weli Maxamed Cali Gaas iyo madaxweynihii hore C/raxmaan Maxamed Faroole.

Madaxweynihii hore ee Puntland C/raxmaan Faroole oo ugu horreyn madasha ka hadlay, ayaa hambalyo u diray madaxweynaha cusub C/weli Gaas isagoo sheegay inuu si aad ah ugu faraxsan yahay in maanta uu xilka ku wareejyo.

"waxan ku faraxsanahay inaan madaxweynaha cusub ku wareejiyo xafiiska madaxtooyada..." Mudane Faroole ayaa yiri isagoo intaas raaciyey " waxan sidoo kale madaxweynaha ku wareejiyey  liiska ciidamada iyo Mashaariicda qabyada ah ee laga hirgelinayo Punltand oo ay kamid yihiin: garoonka diyaaradaha ee Boosaaso, Garoonka Garoowe, Jaamacadda Maakhir, mashruuca dayac-tirka waddada isku xirta Boosaaso iyo Gaalkacayo iyo mashaariicda kale ee qabyada ah.."

Dhanka kale, Faroole ayaa guul u rajeeyey madaxweynaha cusub C/weli Gaas, isagoo ballan qaaday inuu si hagar la'aan ah ula shaqeyn doono "Waxan u rajeynayaa howshaas culus ee hortaalla in Eebe uu u fududeeyo...waxan ballan qaadayaa wixii aan awoodi karo ama talo ah inaan siiyo anigoo aan noqon doonin mid wax ku qabsada haba yaraatee..."

Ugu dambeyntii wuxuu ugu baaqay dadweynaha reer Puntland in ay midnimadooda ilaashadaan, islamarkaana ay si fiican ula shaqeeyaan dowladda cusub ee shanta sano ee soo socota uu hoggaamin doono C/weli Maxamed Cali Gaas.

Madaxweyne C/weli Gaas oo isna si kooban u hadlay, ayaa sheegay inuu si weyn ugu faraxsan yahay in maanta [Janaayo 14, 2014] uu xilka kala wareego madaxweynihii hore C/raxmaan Faroole.

Mudane Gaas ayaa qiray in uu la wareegay dowlad dhisan oo leh hay'ado shaqeynaya iyo maamul wanaagsan, isagoo taas uga mahad celiyey Madaxweyne Faroole iyo intii lasoo shaqaysay.

"..Waxan qirayaa in maanta ay Puntland leedahay dowlad rasmi ah oo xoog leh, oo maamul leh, oo ciidan leh oo hay'ado shaqeynaya oo dastuuri ah leh, taasna mahaddeeda waxaa iska leh madaxweynaha iyo intii lasoo shaqeysay..." Madaxweyne Gaas ayaa sidaas yiri.

Gaas ayaa gabagabadii sheegay inuu si dhow ula shaqeyn doono madaxweynihii hore maadaama uu xog-ogaal yahay, aqoon iyo waayo aragnimo badanna uu u leeyahay xaaladda guud ee Puntland ay xilligan ku sugan tahay.

Xaflad lagu caleema saarayo madaxweynaha iyo madaxweyne ku-xigeenka cusub ee Puntland ayaa isla magaalada Garoowe ka dhici doonta 24-ta bishan aynu ku jirno ee Janaayo.




Maxamed Salaad Xaaji Dirir, Hiiraan Online
[email protected]
Puntland, Soomaaliya












Click here
1/14/2014 8:09 AM EST
Talaado, Janaayo 14, 2014 (HOL) — Kulan ay xildhibaannada baarlamaanka Soomaaliya ku yeesheen Muqdisho ayaa lagu diiday mooshinkii wasiiradii xukuumadii Saacid laga keenay, kadib markii mooshin kaas kasoo horjeeda ay baarlamaanka horgeeyeen 12 xildhibaan.

1/14/2014 2:24 AM EST
Talaado, Janaayo 14, 2014 (HOL) — Maxkamadda sare ee gobolka Virginia ayaa diidday rafcaan uu xukun horay loogu diray ka dalbaday madaxweyne ku xigeenkii hore ee Soomaaliya, Jen. Maxamed Cali Samatar.

1/14/2014 2:08 AM EST
Talaado, Janaayo 14, 2014 (HOL) — Xarakada Al-shabaab oo dagaal kula jirta dowladda Soomaaliya iyo ciidamada AMISOM ayaa shacabka Muqdisho uga digtay inay u dhawaadaan xarumaha dowladda iyo kuwa hay’aduhu ay daggan yihiin. Iyadoo sidoo kale Muqdisho lagu afduubay laba ruux Kenyan ah.

1/14/2014 1:56 AM EST
Talaado, Janaayo 14, 2014 (HOL) — Kulan ballaaran oo ay si wadajir ah u soo qaban-qaabiyeen guddiga dib u dhiska Maktabadda Qaranka - National Libraray, ee Heritage Institute iyo Rugta Ganacsiga Soomaaliyeed loogana hadlayay dib u soo nooleynta maktaabaddii Qaranka ayaa shalay lagu qabtay xarunta rugta ganacsiga Soomaliyeed.

1/14/2014 1:22 AM EST
Talaado, Janaayo 14, 2014 (HOL) — Xildhibaannada Baarlamaanka Somalia ayaa lagu wadaa inay maanta cod u qaadaan mooshin lagu diiddan yahay in wasiirradii xukuumaddii hore ay ka mid noqdaan xukuumadda cusub ee la soo dhisayo.