Jimco, Feberaayo 28, 2014 (HOL) — Golaha Ammaanka ee Qaramada Midoobay ayaa kulan ka yeelanaya toddobaadka soo socda ammaanka Somalia iyo
howlgalka Midowga Afrika ee AMISOM oo dowladda Somalia ka caawinaya dagaalka
ay kula jirto Al-shabaab.
Shirkan ayaa waxaa
Soomaaliya uga qaybgalaya wasiirka
arrimaha dibadda iyo iskaashiga caalamiga ah, C/ramxaan Ducaale Beyle oo isaga
iyo wafdi uu hoggaaminayo ay maanta oo Jimco ka ambabaxeen Muqdisho iyagoo
kusii jeeda magaalada New York ee dalka Mareykanka.
Kulanka looga
hadlayo amaanka Soomaaliya ayaa wuxuu socon doonaa 6-da illaa 8-da bisha Maarso
ee foodda nagu soo haysa, iyadoo shirkan uu kusoo beegmayo iyadoo magaalada
Muqdisho ay maalmahan ka dhacayeen weerarro ay fuliyeen xoogag ka tirsan
Al-shabaab.
Qodobbada looga
hadli doono shirkan ayaa waxaa ka mid ah cunno-qabteyntii hubka ee Soomaaliya
laga qafiifiyay sannadkii hore, iyadoo xilliga loo qabtay oo hal sano ahaa uu ku
eg-tahay bisha Maarso ee soo socota.
Sanad ka hor ayay ahayd
markii xubnaha Golaha Ammaanka ee 15-ka ah ay isla ogolaadeen in Somalia laga
qafiifiyo cunno-qabateynta hubka ee lagu soo rogay Soomaaliya sannadkii
1992-kii, si dowladda Soomaaliya ay ugu suura-gasho inay soo iibsato hubka
fudud.
Balse warbixin ay
dhawaan shaaciyeen guddiga la socodka xayiraadaha hubka ee saran Soomaaliya iyo
Eritrea ayaa lagu sheegay in hub ay dowladda Soomaaliya kasoo iibsatay dalalka Carabta
qaarkood uu gacanta u galay xoogagga Al-shabaab ee ka dagaalama Soomaaliya,
taasoo dowladda Soomaaliya ay beenisay.
Ilo
dublamaasiyadeed oo ka tirsan Qaramada Midoobay ayaa horraantii bishan u
sheegay warbaahinta caalamka qaarkeed in xubnaha Golaha Ammaanka ay qorsheynayaan
inay qafiifinta cunno-qabteynta hubka ee Soomaaliya ay waqti kooban ku daraan.
Wafdiga wasiirka
arrimaha dibadda iyo iskaashiga caalamiga ah ee Soomaaliya ayaa waxaa garoonka
diyaaradaha Muqdisho kusii sagootiyay wasiirka gaadiidka iyo duulista hawada, Siciid
Jaamac Maxamed Qorsheel , wasiir-u-dowlaha wasaaradda arrimaha dibadda, Burci Maxamed
Xamza iyo dublamaasiyiin ka tirsan wasaaradda arrimaha dibadda Soomaaliya.
Maxamed X. Xuseen,
Hiiraan Online
[email protected]
Muqdisho, Soomaaliya