Jimco, Feberaayo 28, 2014 (HOL) — Wasiirka Gaashaandhiga dowladda Jabuuti
Xasan Darar Hufane ayaa sheegay in xiriir milatari ay la yeelanayaan dowladda
Shiinaha ka dib kulamo xiriir ah oo masuuliyiin ka tirsan labada dhinac ay ku
yeesheen magaalada Jabuuti.
"In badan
ayaan u mahad-celinaynaa dowladda Shiinaha waqtiyada adag ee ay nala soo
qaateen ,waxey naga caawin doonaan kor- u qaadidda mashaariic horumarineed oo
dalka laga hirgalinayo "ayuu yiri
Hufane oo ka hadlayay xiriirka labada dowladood.
Wasiirka Gaashaandhiga Shiinaha Chang Wanquan
ayaa booqasho qaadatay laba maalin ku yimid dalka Jabuuti ,waxaana ay kulamo
gaar-gaar ah wada qaateen madaxda dowladda ugu sareysa oo uu ku jiro madaxweyne Ismaacil Cumar Geelle.
"Dowladdeena
diyaar ayey u tahay inaan Jabuuti ka
taageerno tayaynta dhinaca Milatariga iyo waliba Ammaanka "ayuu isna yiri
Chang oo la hadlay warbaahinta ka dib booqashadiisa,isagoo xusay in labada dal
uu ka dhaxeeyo xiriir qota dheer.
Heshiisyo ay labada dhinac si hor dhac ah u
gaareen ayaa waxaa ku jirta in maraakiibta dowladda Shiinaha ay adeegsan karaan
dekadaha dalka Jabuuti ,iyaga oo fududaynaya tababaro gaar ah oo ay siinayaan ciidamada milatariga Jabuuti.
Sidoo kale dowladda Shiinaha ayaa seddex
dekadood ka dhisaysa dalka Jabuuti iyo wado dheer oo isku xiri doonta Jabuuti
iyo waliba wadamada dariska la ah gaar ahaan Itoobiya si kor loogu qaado
xiriirka ganacsi ee geeska Afrika.
Ugu danbayntii dowladda Shiinaha ayaa lagu
wadaa in ay taageero ka gaysato horumarinta ciidamada jabuuti ee ku jira
howl-galka Amisom ee Soomaaliya,iyadoo heshiisyada la gaaray lagu wado in la
dhaqan-galiyo dhawaan.
Faysal Mohamed
Hassan
[email protected]
