5/9/2021
Today from Hiiraan Online:  _
Wararka Maanta- Isniin, Feb 10, 2014
Mudane sheegay in ciidamada Kenya aysan kawada baxay Kismaayo


Isniin, Febraayo 10, 2014 (HOL) – Guddoomiyaha howlaha baarlamaanka Kenya, Aadan Barre Ducaale ayaa ka hadlay arrimaha ciidanka Kenya ee qaybta ka ah howlgalka AMISOM oo la sheegay inay ka baxayaan magaalada Kismaayo ee xarunta gobolka Jubbada Hoose, isagoo beeniyay in ciidanka Kenya ay ka baxayaan Kismaayo.

Xildhibaan Aadan Barre oo la hadlayay BBC-da ayaa sheegay in qayb ka mid ah ciidamadooda ay Kismaayo ka baxyaan, si ay ula shaqeeyaan ciidamada Sierra Leone iyo kuwa maamulka KMG ah ee Jubba.

"Ciidankeenna kama baxayaan Kismaayo, waxaa ku hari doona 200-askari kuwaasoo la shaqeyn doona kuwa ka socda dalka Sierra Leone ee hoggaanka howlgalka lagu wareejin doono, sidoo kale ciidamo booliis ah oo ka socda dalka Nigeria ayaa Kismaayo la geynayaa, kuwaasoo tababari doona ciidamad maamulka Jubba," ayuu yiri xildhibaan Aadan Barre.

Sidoo kale, xildhibaanka oo laga soo doorto magaalada Gaarisa ee gobolka Waqooyi-bari ee Kenya ayaa intaa ku daray in howlgalka AMISOM isbedel lagu sameeyay, isagoo xusay in hal guuto oo ciidamada Kenyaka mid ah la geyn doono degmooyinka Jilib iyo Jamaame oo ka tirsan Jubbooyinka.

"Howlgalka qaybta afaraad ee AMSIOM isbedel ayaa lagu sameeyay, hannaanka la dejiyay waxaa ka mid ah in ciidamada Kenya, Uganda, Burundi iyo Itoobiya ay Al-Shabaab ka saaraan deegaannada ay kaga sugan yihiin Jubbooyinka, maadaama Kismaayo laga saarayo hal guuto oo ciidamada Kenya; kuwaasoo la geynayo degmooyinka Jilib iyo Jammaame," ayuu xildhibaanku ku sheegay wareysiga.

Dhanka kale, xildhibaanku wuxuu sheegay in ammaanka Soomaaliya ay dani ugu jirto dalalka gobolka, sida Kenya, Uganda, Itoobiya iyo dalalka kale, wuxuuna xusay in dalalka gobolka ay dadaal ugu jiraan sidii ay u xasilin lahaayeen Soomaaliya.

Hadalka mudanahan ayaa kusoo beegmaya xilli ururka Midowga Afirka uu dhawaan sheegay inay hoggaanka qaybta afaraad ee howlgalka AMISOM ee Jubbooyinka laga bedelay ciidamada Kenya laguna wareejinayo kuwa ka socda dalka Sierra Leone, isla markaana intooda badan laga saarayo degmada Kismaayo.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
2/10/2014 10:23 AM EST
Isniin, Febraayo 10, 2014 (HOL) –Wafdi uu hogaaminayo Madaxweeynaha maamulka Jubba Sheekh Axmed Max'ed Islaam (Axmed Madoobe) iyo qaar kamid ah siyaasiyiintii kasoo horjeeday maamulkiisa islamarkaana mudooyinkii u danbeeyay ku sugnaa magaalada Muqdisho ayaa maanta si diiran loogu soo dhaweeyay garoonka diyaaradaha magaalada Kismaayo.

2/10/2014 9:18 AM EST
Isniin, Febaraayo 10, 2014 (HOL) - Faahfaahin dheeraad ah ayaa ka soo baxaya qaraxa Muqdisho lagula eegtay maanta mas'uul sare oo ka tirsan maamulka gobolka Shabeellada Hoose, kaasoo aanay jirin illaa hadda sheegatay mas'uuliyaddiisa.

2/10/2014 8:36 AM EST
Isniin, Febaraayo 10, 2014 (HOL) — Madaxweynaha Puntland, C/wali Maxamed Cali Gaas ayaa maanta shir-guddoomiyey kulankii ugu horreeyay ee ay yeeshan golaha wasiirrada cusub ee Puntland, waxaana looga hadlay arrimo badan.

2/10/2014 8:27 AM EST
Isniin, Febaraayo 10, 2014 (HOL) — Khilaafkii siyaasadeed ee golaha wakiiladda Somaliland ka taagnaa ayaa waxa maanta dajiyey xubno ka tirsan golaha Guurtidda iyo Akadamiga nabadda Somaliland, kuwaas oo muddo todobaad ah ka codsaday golaha inay fasax galaan ka dibna dib la iskugu soo noqdo

2/10/2014 7:33 AM EST
Isniin, Febraayo 10, 2014 (HOL) – Ciidammo ka tirsanaa jabhadda ONLF ayaa la sheegay inay isku soo dhiibeen Taliska amniga dowlad deegaanka Soomaalida Itoobiya, iyadoo ciidamadan lagu qanciyay inay nabadda qaataan si looga gudbo caqabadaha hortaagan is-fahan dhamaystiran oo ay gaaraan dhinacyada dowladda iyo mucaaradka.

2/10/2014 7:27 AM EST
Isniin, Febraayo 10, 2014 (HOL) – Taliska ciidanka nabadgelyada waddooyinka Muqdisho ayaa sheegay in in bishii lasoo dhaafay ee Jannaayo ay dhaceen shilalkii ugu badnaa uguna khasaaraha badnaa, iyadoo ay ku soo badanayaan Muqdisho gaadiidka yar-yar ee sida gaarka ah loo leeyahay.

2/10/2014 6:46 AM EST
Isniin, Febraayo 10, 2014 (HOL) – Qarax ayaa goor dhow ka dhacay jidka Maka Al-mukarama ee magaalada Muqdisho. Gaari laga soo buuxiyey walxaha qarxa ayaa la sheegay inuu ku qarxay inta u dhexeysa Taree Biyaano iyo KM4.

2/10/2014 6:33 AM EST
Isniin, Feberaayo 10, 2014 (HOL) - Mas'uuliyiinta maamul gobolka Hiiraan ayaa faah faahin dheeraad ah ka bixiyay xariga rag sheegtay in ay madax ka yihiin maamul gobolleedka la baxay Hiiraan State, oo dhawaan soo gaaray magaalada Beledweyne.

2/10/2014 1:45 AM EST
Isniin, Febraayo 10, 2014 (HOL) –Xaflad gelinkii dambe ee shalay magaalada Boosaaso ka dhacday, ayaa waxaa si rasmi ah xilka ugula wareegay wasiirka cusub ee madaxweynaha Puntland C/weli Maxamed Cali Gaas uu dhowaan xilkaas usoo magacaabay.