Khamiis, Maarso 06, 2014 (HOL) — Xarakada Al-shabaab ayaa shacabka
Soomaaliyeed ugu baaqday in ay ka qayb-qaabtaan dagaallada ay kula jiraan ciidamada
AMISOM, gaar ahaan kuwa ka socda Itoobiya oo dhawaan ku biiray howlgalka Midowga
Afrika ee Soomaaliya.
Afhayeenka Al-shabaab, Sheekh Cali Maxamuud Raage (Sheekh Cali
Dheere) ayaa baaqan ku soo duubay cajalad maqal ah oo soconaysay 20-daqiiqo,
wuxuuna ka hadlay xaaladaha dalku uu ku sugan yahay iyo dagaallada ay ku
jiraan.
"Cadowgiinii soo jireenka ahaa ee Itoobiya wuxuu soo qaatay
duulaan qaawan, isagoo ku labisan shaarka AMISOM, waxaana la idinka doonayaa
inaad ka qaybqaadataan sidii dalka looga difaaci lahaa," ayuu yiri Sheekh Cali
Dheere.
Sidoo kale, afhayeenku wuxuu tusaale u soo qaatay dagaaladii
Somalia iyo Itoobiya dhex-maray sannadihii 1964-kii iyo 1977-kii, isagoo
sheegay inay ahaayeen kuwo ay ka qaybgaleen shacabak Soomaaliyeed oo dhan, isagoo
xusay in Itoobiya ay damac fog ka leedahay Somalia.
"Ummadda Soomaaliyeed waa inay baraarugaan meel walba oo
ay joogaan dalka iyo dibaddiisa cadowga soo jireenka ah ee Itoobiya maanta
garab ayuu ka helayaa gaalada caalamiga ah waa inaad dalkiina ka difaacdaan
cadowgan," ayuu hadalkiisa ku yiri Sheekh Cali Dheere.
Afhayeenka oo sii hadlay ayaa baaq u diray qabaa'illada Soomaaliyeed,
isagoo ka codsaday inay adkeeyaan kaalinta ay ka geysanayaan difaaca dalka,
kana soo horjeestaan qorshayaasha cusub ee loo maleegayo Soomaaliya.
"Innaga Al-shabaab ahaan waxaan sii wadaynaa dagaalka aan
kula jirno kuwa nagu soo duulay,; waana sii wadi doonaa inta ay naftu nagu
dambeyso," ayuu afhayeenku mar kale yiri, isagoo ku boorriyay Soomaalida
inay dhexda xirtaan.
Ciidamada Itoobiya oo horraantii sannadkan 2014-ka ka mid
noqday howlgalka AMISOM ayaa shalay la wareegay degmada Rabdhuure ee gobolka
Bakool, iyadoo ciidammo badan geeyay gobollada Koonfurta iyo Bartamaha
Soomaaliya si ay ula dagaalamaan Al-shabaab.
Xarakada Al-shabaab ayaa saddexdii sano ee lasoo dhaafay laga
qabsaday deegaanno ay horay uga talinaysay oo ay ka mid yihiin, Baydhabo,
Kismaayo, Jowhar, Marko iyo Baladweyne, balse weli waxay kooxdu gacanta ku
haysaa deegaanno badan oo ku yaalla Bartamaha iyo Koonfurta Soomaaliya.
Maxamed X. Xuseen, Hiiraan Online
[email protected]
Muqdisho, Soomaaliya