Khamiis, Maarso 06, 2014 (HOL) — Guddoomiyaha cusub ee gobolka
Banaadir ahna duqa magaalada Muqdisho, Xasan Maxamed Xuseen (Muun-gaab) ayaa
maanta kulan la qaatay dhammaan agaasimayaasha dowladda hoose ee Muqdisho iyo
maamulka Gobolka Banaadir.
Kulankan oo ka dhacay xafiiska guddoomiyaha gobolka ayaa waxaa
kasoo qayb-galay 35-agaasime, waxaana ujeeddada kulanka ahayd isbarasho iyo
dardaaran uu u jeediyay dhammaan agaasimayaashii uu la kulmay.
Intii uu shirku socday ayuu guddoomiyaha gobolka wuxuu u caddeeyay
agaasimeyaashii uu la kulmay iyo dhammaan shaqaalaha gobolka Banaadir oo dhan
inaysan jirin inuu doonayo inuu badalo.
Sidoo kale, wuxuuna sheegay in qorshihiisa aysan ahayn badal
shaqsi oo kaliya, balse uu yahay isbedel dhab ah oo shaqeeya oo ka dhex-dhasha
dhammaan waaxyaha kala gadisan ee maamulka gobolka iyo dowladda hoose ee
Muqdisho.
“Ma jirto cid shaqadeeda wadata oo aan bedeleyno, waxaa keliya
oo aan beddeli doonaa ciddii shaqadeeda gudan wayda oo aan kasoo bixin waajibaadka
la saaray iyo adeegga ay shacabka u heyso,” ayuu Muun-gaab kulanka ka saaray.
HALKAN KA DAAWO SAWIRRO BADAN:
Duqa Muqdiso ayaa kula dardaarmay dhammaan howl-wadeennada
kala duwan ee dowladda hoose iyo maamulka gobolka Banaadir inay dhaxda u
xirtaan sii ay u laba-jibaari lahaayeen holwaha ay u hayaan shacabka Muqdisho.
Agaasimeyaashii kulanka ka qaybgalay ayaa uga mahadceliyay guddoomiyaha
gobolka Banaadir kalanka is-barashada ah iyo dardaarankii daba-socday, waxayna
ballan-qaadeen inay laba-jibaari doonaan howshooda.
Markii uu kulanku soo dhammaaday ayaa waxaa saxaafadda la
hadlay afhayeenka maamulka gobolka Banaadir, Maxamed Yuusuf Cismaan oo sheegay
in kulanka uu guul kusoo dhamaaday, isla markaana ay jiri doonaan kulammo wada-tashi
ah oo duqa Muqdisho uu la qaadan doono qaybaha kala duwan ee bulshada.
Afhayeenka ayaa sidoo kale tilmaamay in guddoomiyaha gobolka uu
soo kormeeray xafiisyada kala duwan ee mamaulka gobolka, isagoona dhanka kale sheegay
in wax weyn laga bedelay hanaankii helitaanka kaararka aqoonsiga ee
muwaadinimo.
Boor-weyn oo lagu dhajiyay afaafka hore ee xarunta
teesarashaaya aqoonsida muwaadinimo laga baxsho ayaa lagu soo daabacay
magacyada shaqsiyaadka ay u soo baxeen kaararka, taasoo lagu ogeysiinayo inay
soo doontaan kaararkooda, waxaana sidoo kale la adkeeyay amniga xaruntaas.
Maxamed X. Xuseen, Hiiraan
Online
[email protected]
Muqdisho, Soomaaliya